Իրանի և Վրաստանի հետ էլեկտրահաղորդման գծերի շահագործումը նոր մակարդակի կբարձրացնի ՀՀ էներգետիկ համակարգը. Նախագահ

ՔԱՂԱՔԱԿԱՆ 25 Հունվար, 2017 12:02

Էներգետիկայի բնագավառը, լինելով Հայաստանի Հանրապետության տնտեսության կարևոր ճյուղերից մեկը, վերջին տարիներին էական ձեռքբերումներ է գրանցել: Էներգետիկայի ոլորտում տարվող աշխատանքներն ուղղված են Հայաստանի էներգետիկ անվտանգության մակարդակի բարձրացմանը, հուսալի և անխափան ծառայությունների մատուցմանը:

Այս մասին հունվարի 25-ին Երևանում մեկնարկած «Էներգետիկայի շաբաթ 2017» միջոցառումների շրջանակներում անցկացվող համաժողովի բացմանը ասել է ՀՀ Նախագահ Սերժ Սարգսյանը:

Նա նշել է, որ միջազգային կազմակերպությունների աջակցությամբ գրեթե ամբողջովին արդիականացվել են համակարգային նշանակություն ունեցող բարձրավոլտ ենթակայանները:

«Բացի այդ, այս բնագավառում շարունակական և հետևողական աշխատանք է տարվում նոր հզորություններ ստեղծելու, էլեկտրահաղորդման նոր գծեր կառուցելու, նոր տեխնոլոգիաներ ներդնելու ուղղությամբ»,- «Արմենպրես»-ի հաղորդմամբ` նշել է ՀՀ Նախագահը:

Նա հավելել է, որ էներգետիկ ոլորտում Հայաստանը տարածաշրջանում սերտ համագործակցություն ունի Իրանի և Վրաստանի հետ:

«2019 թ. շահագործման կհանձնվեն Հայաստան-Իրան և Հայաստան-Վրաստան էլեկտրահաղորդման գծերը, որոնք լիովին նոր մակարդակի կբարձրացնեն Հայաստանի էներգետիկ համակարգը: Նշված ծրագրերը թույլ կտան իրականացնել էլեկտրաէներգիայի տարանցումներ, սեզոնային փոխհոսքեր և փոխանակումներ, ինչպես նաև առևտրային այլ գործարքներ»,- նշել է ՀՀ Նախագահը:

Սերժ Սարգսյանը հայտնել է, որ Հայաստանը՝ որպես ԵԱՏՄ անդամ երկիր, կարող է յուրօրինակ կամուրջ լինել Իրանի Իսլամական Հանրապետության և ԵԱՏՄ-ի միջև: Այդ հանգամանքը, ըստ Նախագահի, լիովին հնարավորություններ է ստեղծում ներդրումային բազմաթիվ ծրագրերի իրականացման համար՝ ինչպես տեղական, այնպես էլ մասնավոր հատվածի կողմից:

«Էներգետիկայի շաբաթ 2017» միջոցառումների եռօրյա շարքը իրականացվում է Հայաստանի վերականգնվող էներգետիկայի և էներգախնայողության հիմնադրամի, «Էքսպոմեդիա» ցուցահանդեսների նախագծման կենտրոնի նախաձեռնությամբ: Միջոցառման շրջանակներում կներկայացվեն Հայաստանում էներգետիկայի և էներգախնայողության ոլորտում կատարված վերջին զարգացումներն ու առկա հիմնախնդիրները, ինչպես նաև՝ ոլորտում հավանական ներդրումների հեռանկարները: