Փաստաբան Տիգրան Սարգսյանը՝ ՀՎԿ ցուցակով առաջադրվելու և իրավական համակարգում բարեփոխումներ անելու մասին

Past.am-ի զրուցակիցն է փաստաբան, «Հայկական վերածնունդ» կուսակցության իրավական հանձնաժողովի ղեկավար Տիգրան Սարգսյանը

 

– Պարոն Սարգսյան, Ձեր անունը ներառված կլինի՞ ՀՎԿ համամասնական ցուցակում:

 

– Պաշտոնական որոշում չկա, բայց քննարկվում է:

 

– Իսկ ցանկություն կա՞ ռեյտինգային պայքարի մեջ մտնելու:

 

– Այո:

 

– Ինչպիսի՞ ծրագրեր ունեք կամ ի՞նչ առաջնահերթություններ եք տեսնում՝ կապված ձեր ոլորտի հետ:

 

– Դատախազների, քննիչների ընտրության, վերապատրաստման, աշխատանքի գնահատման և հասարակական վերահսկման ժամանակակից համակարգ է անհրաժեշտ ներդնել: Իրավապահ համակարգի գործունեությունը պետք է լինի տեսանելի և վերահսկելի հասարակության կողմից: Հասարակական կազմակերպությունները, փաստաբանները, իրավապաշտպանները, ցանկացած մտահոգ քաղաքացի պետք է կարողանա իրավապահ համակարգի գործունեությանը հետևել և ծանոթանալ աշխատանքների վերաբերյալ հաշվետվություններին: Այսօր հասարակությունը չի վստահում իրավապահ մարմիններին և դրա հիմնական պատճառը համակարգի փակ լինելն է:

 

– Հանցանք կատարած անձինք ազատազրկման վայրերում ուղղվո՞ւմ են: Ի՞նչ է ցույց տալիս պրակտիկան: Տեղյակ ենք, որ այս մասին բազմաթիվ առաջարկներ ունեք:

 

– Մենք չունենք դատապարտյալների ուղղման ժամանակակից պահանջներին համապատասխան պայմաններ: Դատապարտյալի ուղղման համար անհրաժեշտ է ապահովել պայմաններ ազատազրկման դատապարտվածի կրթության, ստեղծագործական աշխատանքով զբաղվելու, մշակութային արժեքների հետ հաղորդակցման, առողջության պահպանման և այլ կենսական նշանակության իրավունքների իրացման համար:

 

– Դատական համակարգի նկատմամբ հասարակության անվստահությունը գնալով աճում է: Ի՞նչ եք ցանկանում փոխել համակարգում:

 

– Մենք հանդես ենք գալիս դատական համակարգի բարեփոխման և արդիականացման ծրագրով: Գտնում ենք, որ անհրաժեշտ է դատական համակարգը համալրել հասարակության մոտ վստահություն վայելող մասնագետներով, դատարանի և դատավորի աշխատանքի հասարակական վերահսկման և գնահատման մեխանիզմներ ներդնել, բարձրացնել դատավորի անկախությունն և ինքնուրույնությունը, օրենսդրական փոփոխություններով բարձրացնել դատական ակտերի որակին ներկայացվող պահանջները՝ դրանց հիմնավորվածության և պատճառաբանվածության ավելի բարձր չափորոշիչներ ներդնելով:

Լևոն Փանոսյան

Կիսվել