Սերժ Սարգսյանին ձեռք չի տալիս Ծառուկյանի վերադարձը. Լյուդմիլա Սարգսյան

ՀՀԿ նիստի իր ելույթում Սերժ Սարգսյանն ասաց, որ չի ողջունել Գագիկ Ծառուկյանի վերադարձը քաղաքականություն:

Past.am-ի հարցին՝ դա Ծառուկյանի և Սարգսյանի միջև նոր առճակատումների պատճառ կարո՞ղ է լինել, Վերակազմյալ Սոցիալ-դեմոկրատ Հնչակյան կուսակցության նախագահ, ԱԺ ՀԱԿ խմբակցության պատգամավոր Լյուդմիլա Սարգսյանն ասաց,որ ոչինչ պետք չէ բացառել, բայց չարժե նախնական եզրակացություններ անել:

Տիկին Սարգսյանի խոսքով՝ պետք է հետևել զարգացումներին և սպասել ընտրությունների արդյունքներին:

Մեր զրուցակիցն ընդգծեց. «Սերժ Սարգսյանին ձեռք չի տալիս Ծառուկյանի վերադարձը, որովհետև նրա դաշինքը կարող է հակակշիռ դառնալ իշխող քաղաքական ուժին՝ դարձնելով այն ընդդիմություն: Հետևաբար, ՀՀԿ-ն շահագրգիռ չէ այս հարցում և պատրաստ չէ որևէ մեկին զիջել իշխանությունը»: Հարցին՝ ի՞նչ կարող են տալ փոքր կուսակցությունները կամ «մարդ կուսակցությունները» Գագիկ Ծառուկյանի նախաձեռնած լայն դաշինքին, Սարգսյանը պատասխանեց. «Ձեր ձևակերպումը կոռեկտ չէ, բայց կարող եմ ասել, որ նոր Սահմանադրությունը ենթադրում է կուսակցությունների միավորում: Ես ենթադրում եմ, որ այդ գործընթացը հաստատ կգնա, որովհետև, ըստ էության, մարդկային ռեսուրս և ֆինանս չունեցող փոքր կուսակցությունները կորցնում են իրենց դերակատարությունը: Տրամաբանությունը հուշում է, որ բոլորը պետք է գնան խոշորացման»:

Տիկին Սարգսյանը հրաժարվեց մեկնաբանել Հովիկ Աբրահամյանի վերջին հայտարարություններն ու քայլերը՝ նշելով, որ այս փուլում ցանկությունն չունի խառնվել այլ ուժերի ներքին հարցերին:

Լևոն Փանոսյան