Արտակ Դավթյանը ընտրություններին մասնակցող բոլոր ուժերին մրցակից է համարում ՀՀԿ-ի համար

 Ազգային ժողովի ՀՀԿ խմբակցության պատգամավոր Արտակ Դավթյանը Ազգային ժողովի առաջիկա ընտրություններին մասնակցող բոլոր քաղաքական ուժերին մրցակից է համարում իշխող Հանրապետական կուսակցության համար: «Արմենպրես»-ի հաղորդմամբ՝ հունվարի 30-ին լրագրողների հետ հանդիպմանը, հարցին, թե ո՞ր քաղաքական ուժը կարող է առաջիկա ընտրություններում մրցակից լինել ՀՀԿ-ի համար, նա պատասխանեց. «Բոլոր այն քաղա քական ուժերը, որոնք կմասնակցեն ընտրական գործընթացին, Հանրապետականի համար մրցակից են: Իսկ թե ինչ կլինի ընտրությունների արդյունքում, ցույց կտա ժողովրդի քվեարկությունը»:

Պատգամավորն անդրադարձավ նաև քաղաքականություն վերադառնալու Գագիկ Ծառուկյանի որոշմանը: Նա հիշեցրեց, որ մի քանի անգամ ասել է, որ Ծառուկյանի որոշելիքն է` վերադառնալ քաղաքականություն, թե ոչ: Պատգամավորի խոսքով` ցանկացած ՀՀ քաղաքացի, ով որոշում է կայացնում, որը գործող օրենսդրության շրջանակներում է, ինքը հարգում է այդ որոշումը:

Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Նախընտրական քարոզարշավը կմեկնարկի մարտի 5-ին: Կուսակցություններն ու կուսակցությունների դաշինքներն Ազգային ժողովի ընտրություններին մասնակցելու հայտերը Կենտրոնական ընտրական հանձնաժողով պետք է ներկայացնեն փետրվարի 6-16-ը, իսկ տարածքային և համամասնական ցուցակները` փետրվարի 16-26-ը: