Թուրքիայի մեջլիսի հայ պատգամավորը շնորհավորել է Գլեդիս Բերեջիկլյանին

 Թուրքիայի ընդդիմադիր քեմալական Հանրապետական ժողովրդական կուսակցության հայ կին պատգամավոր Սելինա Դողանը նամակ է գրել Ավստրալիայի Նոր Հարավային Ուելս նահանգի 45-րդ վարչապետ ընտրված քաղաքական գործիչ Գլեդիս Բերեջիկլյանին։ Ինչպես հաղորդում է «Արմենպրես»-ը, այս մասին տեղեկացնում է Ստամբուլի հայկական «Ակոս» պարբերականը:

Բերեջիկլյանին ուղղված շնորհավորական նամակում Դողանը նշել է, որ ստիպված են պոլսահայ գրող Զաբել Եսայանի պես ուժեղ լինել և արարել։ Դողանը շեշտել է, որ 100 տարի առաջվա տառապանքների հետևանքով աշխարհի տարբեր անկյուններում ապրող ազգի զավակներ են և ապրում են պատմական, սոցիոլոգիական և քաղաքական տարբեր իրականություններ ունեցող երկրներում։

«Նախ և առաջ ցանկանում եմ շնորհավորել Ձեզ՝ Ավստրալիայի Նոր Հարավային Ուելսի Լիբերալ կուսակցության նախագահի և նահանգի 45-րդ վարչապետի պաշտոնները ստանձնելու կապակցությամբ։ 100 տարի առաջվա մեծ տառապանքներից հետո աշխարհի մի շարք անկյուններ ցրված ազգի մասնիկներն ենք։ Պատմական, սոցիոլոգիական և քաղաքական տարբեր իրականություններ ունեցող երկրներում ենք ապրում։ Որպես փոքրամասնություն և կին՝ փորձել ենք և փորձում ենք հաղթահարել մի շարք դժվարություններ։ Չնայած բոլոր դժվարություններին, մենք՝ հայ կանայք, ստիպված ենք քաղաքականությամբ զբաղվե լ՝ հաշվի առնելով մեր հասարակությունների իրականությունները, ստիպված ենք համակեցության, հասարակական համերաշխության և գենդերային հավասարության համար պայքարել։ Ստիպված ենք ուժեղ լինել և արարել ինչպես Զաբել Եսայանը։ Ստիպված ենք համերաշխության մեջ գտնվել աշխարհի մի շարք երկրներում քաղաքականությամբ, արվեստով զբաղվող, մայրություն անող հայ կանանց հետ։ Որպես պատգամավոր հայ կին, ով Թուրքիայում քաղաքականությամբ է զբաղվում՝ Ձեզ կրկին շնորհավորում եմ նոր պաշտոնների կապակցությամբ։ Հպարտ կլինեմ Ձեզ հյուրընկալելու Թուրքիայում»,- նամակում նշել է Թուրքիայի մեջլիսի հայ պատգամավոր Սելինա Դողանը։