Փետրվար ամսվա կլիմայական բնութագիրը եւ ամսական կանխատեսումը

Հանրապետության տարածքում փետրվար ամսվա օդի ջերմաստիճանը միջինը կազմում է -5...-8 աստիճան, որը 1 աստիճանով բարձր է հունվարի միջին ջերմաստիճանից: Առաջին տասնօրյակը բնորոշվում է առավել ցածր ջերմաստիճաններով, այնուհետեւ ջերմաստիճանը աստիճանաբար բարձրանում է: Այդ մասին հայտնում է ԱԻՆ «Հայհիդրոմետը»:

Փետրվարին միջին ամսական ջերմաստիճանը հանրապետության տարածքում շատ բազմազան է: Ըստ բարձրության ջերմաստիճանը նվազում է: Մինչեւ 800 մետր բարձրության վրա (Իջեւան, Ալավերդի, Բերդ, Մեղրի) միջին ամսական ջերմաստիճանը դրական է` մոտ 2 աստիճան, 800-1000 մետր բարձրության վրա (Արարատյան դաշտ, Վայոց ձոր ցածրադիր մասեր)` -1…-2 աստիճան, 1000-1500մ բարձրության վրա (Լոռի, Արագածոտնի եւ Սյունիքի նախալեռնային շրջաններ)` -2 աստիճան, 1500-2000 մետրի վրա (Շիրակ, Արագածոտնի եւ Կոտայքի լեռնային շրջաններ, Գեղարքունիք)` -4…-6 աստիճան: Փետրվար ամսվա բացարձակ նվազագույն ջերմաստիճանը` դիտվել է Պաղակնում` -41 աստիճան (1947թ), եւ Աշոցքում` -40 աստիճան (1946թ.): Երեւանում փետրվարի միջին ջերմաստիճանը –0.9 աստիճան է, իսկ բացարձակ նվազագույնը` -26 աստիճան դիտվել է 1928թ-ին, -27 աստիճան 1972թ: Խիստ ցուրտ փետրվարներ դիտվել են 1949, 1950, 1969, 1972, 1976, 1979, 1986 թվականներին: Մասնավորապես 1976թ.-ին հանրապետության տարբեր շրջաններում այն 6-80-ով ցածր էր հունվարի միջին ջերմաստիճանից: Գյումրիում եւ Պաղակնում օդի միջին ջերմաստիճանը եղել է -16… -18 աստիճան, այսինքն նորմայից ցածր ` 10-12 աստիճան):

Երեւանում 1885-2010թթ. ժամանակահատվածում 16 անգամ դիտվել են խիստ ցուրտ փետրվարներ, երբ օդի միջին ամսական ջերմաստիճանը եղել է -8 աստիճան:

Սովորաբար փետրվարը հունվարից տաք է, սակայն տարիների 15-20%-ի դեպքում միջին ամսական ջերմաստիճանը փետրվարին հունվարից ցածր է եղել:

Տաք փետրվարներ դիտվել են 1955, 1963, 1966, 1979, 1986, 1987, 1999, 2004, 2009, 2010թթ.: Այդ տարիներին Արմավիրի, Արարատի մարզերում, Տավուշի եւ Սյունիքի ցածրադիր մասերում օդի միջին ամսական ջերմաստիճանը եղել է +5…+6 աստիճան: Բացարձակ առավելագույն ջերմաստիճանը Երեւանում հասել է +20 աստիճան (1955թ.), Կապանում` +26 աստիճան (1955թ.):

Փետրվարին տեղումների քանակը հանրապետությունում կազմում է 41մմ, որը տարեկան նորմայի 7%-ն է: Սակայն այդ քանակը տարածքում բաշխվում է անհամաչափ: Տավուշի եւ Սյունիքի հովիտներում միջինը դիտվում է 27-29մմ, Արմավիրի եւ Արարատի մարզերում 21մմ, 1200-2000մ բարձրությունների վրա 32-37մմ, 2000-2500մ բարձրությունների վրա` 40-50մմ, ավելի բարձր` մինչեւ 80մմ: Երեւանում տեղումների քանակը միջինը կազմում է 30մմ: Տեղումների քանակը զգալիորեն տարբեր է եւ ըստ տարիների` 1975,1985 թթ. փետրվարին հանրապետության տարբեր շրջաններում տեղացել է ամսական նորմայի կրկնապատիկ, առանձին շրջաններում եռապատիկ քանակը (Հրազդան, Սիսիան, Արմավիր, Գավառ): Փետրվարը տեղումներով առատ է եղել 1928, 1938, 1952, 1956,1984, 1990, 1997,2006 թվականներին:

Հանրապետության տարածքում հիմնականում դիտվում է ձյուն, սակայն հովտային շրջաններում տարիների 20%-ի դեպքում դիտվել է անձրեւ: Այդ շրջաններում փետրվարին ձնածածկը կազմում է 8-14 օր: Նրա բարձրությունը չի գերազանցում 7սմ-ը, դիտվում են տարիներ, երբ ձյունը վերանում է փետրվարի առաջին տասնօրյակին: Հովտային շրջաններում առանձին դեպքերում կայուն ձնածածկ բոլորովին չի առաջանում:

Լեռնային շրջաններում ձնածածկը պահպանվում է ողջ ամսվա ընթացքում եւ բարձրությունը հասնում է 20-40 սմ, բարձր լեռնային շրջաններում` 70-150 սմ: Փետրվարին հարաբերական խոնավությունը հանրապետությունում միջինը 72% է:

Մառախուղով օրերի թիվը փետրվարին միջինը դիտվում է 1-8 օր: Մառախուղներ դիտվում են հիմնականում լեռնանցքներում եւ ցածրադիր վայրերում: Երեւանում փետրվարին միջինը 8 օր դիտվում է մառախուղ (1974թ. եւ 1993թ. համապատասխանաբար 22 եւ 25 օր): Փետրվարը հունվարի համեմատ ավելի քամոտ է, զգալիորեն քչանում է անդորր օրերի քանակը: Քամու առավելագույն արագությունն առանձին վայրերում փետրվարին հասնում է 20-30 մ/վրկ, իսկ լեռնանցքներում եւ բարձր լեռնային գոտում` մինչեւ 35 մ/վրկ, պոռթկումները` 40 մ/վրկ: Լեռներում եւ լեռնանցքներում հաճախ դիտվում է բուք, միջինը` 7-12 օր: