Լուսինե Բադալյան. «Տարիքս չի վախեցնում ինձ»

Tert.am Life–ը գրում է

Դրական, անկեղծ, բնական, համեստ, միևնույն ժամանակ հատուկ, տրամադրություն հաղորդող մարդ... նմանատիպ խոսքերով և շնորհավորական մաղթանքներով է լցված հաղորդավարուհի Լուսինե Բադալյանի ֆեյսբուքյան էջը։ Այսօր հաղորդավարուհին տոնում է իր 37–ամյակը։ Tert.am Life–ը կապ հաստատեց հոբելյարի հետ ու զրուցեց տարեդարձի անակնկալների և ոչ միայն այդ ամենի մաիսն։

 Առաջինը շնորհավորեց…

 Գիշերը 11։30–ից արդեն իսկ կային շնորհավորանքներ։ Երեխաներս էին անհամբեր սպասում, երբ է 00։00 լինելու, որ շնորհավորեն։ Անակնկալներ, որպես այդպիսին, առանձնապես դեռ չկան։ Բոլոր զանգերն ու շնորհավորանքներն ինձ համար անակնկալ են, որոնք և՛ հուզիչ են, և՛ հումորային. մեկ ծիծաղում եմ, մեկ արտասվում։

 Մեր ընտանիքում պետք չէ սպասել տոն օրերին, որ ինչ-որ պոռթկումներ լինի...

 Մեզ մոտ սովորական օրերն առանձնապես չեն տարբերվում տոնական օրերից։ Ոչ թե տոնական օրերն են անհետաքրքիր, այլ մեզ առանձնապես հատուկ առիթ պետք չէ`արտահայտելու այն, ինչ ուզում ենք ասել։ Երբ երեխաներս դպրոցից տուն են գալիս, միշտ ասում են`դու աշխարհի ամենալավ մաման ես, դու մեր հրաշքն ես, ինչ լավ ա, որ դու կաս։ Այս ամենն այնքան առօրեական է։ Չենք սպասում տոնական օրերին, որ ինչ-որ պոռթկումներ լինեն։ Մի կողմից դա հաճելի է, մյուս կողմից տոնական օրը կորցնում է իր յուրահատկությունը։

 Տարեդարձիս օրը…

 Հետաքրքիր է, ինչ ինձ հիշում եմ, եթե նույնիսկ մինչև փետրվարի 1–ը  բուք, սառնամանիք եղած լինի, ամսի 2–ին արև է դուրս գալիս։ Միայն անցած երկու տարիներին այդպես չի եղել, ինչն ինձ մտահոգում էր։ Կարծում էի՝ ինչ-որ բան այն չէ։ Բայց արի ու տես՝ այս տարի էլ արևոտ եղանակ է։

 Տարիքը երբեք չի վախեցնում ինձ, ամեն տարի ինձ համար ավելի հաճելի է …

 Ամեն պահ եմ ինքս ինձ բացահայտում։ Ես մի բան եմ հասկացել, որ անկախ նրանից՝ մարդիկ ինչ են մտածում, կյանքն ինչպես է դասավորվում, ինչ-որ մեկի մոտ հեշտ է ստացվում, մյուսի մոտ դժվար, երբեք պետք չէ կորցնել քո ներքին հոգու, սրտի մաքրությունը։ Ինչ էլ լինի, դու պետք է սեր տարածես շուրջբոլորը։ Պետք է քո կողքի մարդիկ իրենց յուրահատուկ զգան, քանի որ այդ ամենը փոխադարձ է լինում։ Ես ինքս ինձ միշտ մի բան եմ մաղթում, որ իմ շրջապատում բոլորն անհոգ, առողջ լինեն և մարդիկ չպակասեն, եթե ավելանան, շատ ավելի լավ։  

 Չեմ սիրում նշել տարեդարձս…

 Ծնունդս ընտանեկան միջավայրում կնշեմ, ինչպես միշտ։ Ես առանձնապես չեմ սիրում նշել տարեդարձս։ Ինձանից շատ երեխաներս կամ ընտանիքիս անդամներն են սպասում տարեդարձիս, հետևաբար սա այն օրն է, որ պետք է հարազատներով, ընտանիքիս անդամներով շրջապատված լինեմ։ Իհարկե, ռադիոկայանում էլ արդեն ավանդույթ է դարձել յուրահատուկ ձևով տոնել տարեդարձերը, ինչը շատ հետաքրքիր է և անակնկալներով լի։