Պատգամավորն էթիկայի հանձնաժողովի աշխատանքի համար անհրաժեշտ է համարում ներգրավված բոլոր անձանց մասնակցությունը

ԱԺ պատգամավոր Թեւան Պողոսյանը անհրաժեշտ է համարում ԱԺ էթիկայի հանձնաժողովում հետեւողական աշխատանք տանելը, ինչպես նաեւ ներգրավված բոլոր կողմերի մշտական մասնակցությունը գործընթացում:

«Կարելի է ասել, ընթացակարգային առումով հանձնաժողովը 100 տոկոսով է աշխատանք կատարել.  դիմումներ ստացվել են, քննարկվել, ոչ պատշաճ դիմումները հետ են ուղարկվել եւ այլն: Հասկանում եմ, որ սա նորություն է, եւ կայացման համար միգուցե ճանապարհ պետք է անցեինք:  Պետք է պարզապես հասկանալ, թե ինչ է ներկայացնում այդ պատժամիջոցների արժեքը, եթե ուզում էինք, որ կայանա էթիկայի ինստիտուտը: Ուրախ կլինեի, որ հետեւողական կերպով նույն մարդիկ լինեին ամեն նստաշրջանում ձեւավորվող հանձնաժողովում: Կարծում եմ նաեւ, որ պետք է կարողանանք վարքագծերը գնահատել այն մարդկանց մասնակցությամբ, ովքեր եղել են տվյալ գործընթացում: Օրինակ, ինչու չկարողացանք ուրիշ մարդկանց փոխարեն քվեարկած անձանց վերաբերյալ գործին ընթացք տալ, քանի որ մարդիկ չեկան, քվորում չեղավ, երկու հոգով էինք մնացել»,-«Արմենպրես»-ի հաղորդմամբ՝ ասաց նա:

Թեւան Պողոսյանն առաջարկում է «ԱԺ մոնիտորինգ» ծրագրի անդամներին անհատապես հանդիպել հանձնաժողովի բոլոր անդամներին, քննարկումներ անցկացնել  եւ ի մի բերել առաջարկությունները:

«Եղել են դեպքեր, որ խնդրել եմ քննությունը երկարաձգվի, որպեսզի բոլոր ներգրավված կողմերի հետ հանդիպեմ, զրուցեմ, եղել է, որ ամբողջ հանձնաժողովի դեմ միայնակ եմ մնացել: Ես խնդրում եմ՝ ամեն օր բողոք ուղարկեք, որպեսզի  հանձնաժողովը ստիպված լինի աշխատել: Երբ բողոք չի լինում, իսկապես աշխատանք էլ չի լինում»,-ընդգծեց պատգամավորը: