Թրամփի վարչակազմը պաշտոնապես հայտարարել է Իրանն «աչքի տակ առնելու» մասին

ԱՄՆ նախագահ Դոնալդ Թրամփի ազգային անվտանգության հարցերով ավագ խորհրդական Մայքլ Ֆլինը հայտարարել է, որ նախագահի վարչակազմն «աչքի տակ է առել» Իրանը՝ այդ երկրի կողմից վերջերս իրականացված հրթիռային փորձարկման առնչությամբ:

Ինչպես նշում է The Guardian-ը, Ֆլինը մանրամասնել է, որ Իրանի վերջին գործողությունները դրդել են Սպիտակ տանն «աչքի տակ պահել» իսլամական հանրապետությանը, որի դեմ կնախաձեռնվեն պատասխան քայլեր:

Բրիտանական պարբերականը նկատում է, որ սա Ֆլինի՝ պաշտոնը ստանձնելուց հետո առաջին պաշտոնական հայտարարությունն էր:

Սպիտակ տանը կայացած ճեպազրույցի ժամանակ Թրամփի խորհրդականն ասել է, որ հրթիռի կիրակնօրյա արձակումը, ինչպես նաև Իրանի աջակցությունը վայելող հութի զինյալների կողմից հունվարի 30-ին սաուդյան ռազմանավի դեմ իրականացված հարձակումն անվստահություն են ներշնչում Իրանի նկատմամբ:

Մինչ Ֆլինը խուսափել է Վաշինգտոնի պատասխան քայլերի վերաբերյալ պարզաբանումներ տալուց, Սպիտակ տան մամուլի խոսնակ Շոն Սփայսերն ասել է, որ «նախագահ Թրամփն ուզում է իրանցիներին հասկացնել, որ Վաշինգտոնը չի պատրաստվում նստել ու լուռ հետևել նրանց գործողություններին»:

«Սա կա՛մ դատարկ սպառնալիք է, կա՛մ էլ Իրանի հետ պատերազմելու հստակ հայտարարություն: Երկու դեպքում էլ վտանգը մեծ է: Ուժեղ ու հզոր թվալու համար Թրամփի վարչակազմը կարող է ներքաշվել այնպիսի պատերազմի մեջ, որի ֆոնին Աֆղանստանի և Իրաքի պատերազմներն այգում զբոսնելու պես բան կլինեն»,-նշել է Վաշինգտոնի Միջազգային ճգնաժամային խմբի իրանցի քաղաքագետ Ալի Վաեզը:

Պարբերականը հիշեցնում է, որ նախընտրական քարոզարշավի ժամանակ Թրամփն ու նրա թիմի անդամները շարունակ ասել են, որ իշխանության գալու դեպքում ավելի կոշտ դիրքորոշում կունենան Իրանի հանդեպ: