Սանկտ Պետերբուրգում մարտ ամսից Երևանի մասին սոցիալական տեսահոլովակ կցուցադրվի

   Միջազգային և միջտարածաշրջանային համագործակցության զարգացման նպատակով այս տարի Երևանը ներկայացվել է 18-րդ Կովկասյան զբոսաշրջային ցուցահանդեսին Թբիլիսիում և Չինաստանում կայացած Քաղաքապետների 5-րդ միջազգային զբոսաշրջային ֆորումին։ Այս մասին «Արմենպրես»-ի փոխանցմամբ ասաց Երևանի քաղաքապետարանի տուրիզմի բաժնի աշխատանքները համակարգող, Երևանի քաղաքապետի օգնական Մարիա Բարաղամյանը։ 

Քույր և գործընկեր քաղաքների համագործակցության շրջանակներում համաձայնագրեր են կնքվել Երևան և Սանկտ Պետերբուրգ, Երևան և  Կազան քաղաքների միջև զբոսաշրջության զարգացման համատեքստում։ 

2016 թվականին Երևան քաղաքը անվճար սոցիալական գովազդ է ունեցել Սանկտ Պետերբուրգի բիլբորդների վրա, որոնք եղել են տեսահոլովակի տեսքով։ 2017 թվականի փետրվարի 2-ից այդ ծրագիրը նորից վերսկսվել է և մարտ-ապրիլ ամիսներից մայրաքաղաքի մասին տեսահոլովակը կրկին կցուցադրվի Սանկտ Պետերբուրգում։   

«Փորձի փոխանակման նպատակով համագործակցության ծրագրեր են իրականացվել ֆրանսիական Լիոն, Իլ դե Ֆրանս, Փարիզ քաղաքների հետ»,- նշեց Բարաղամյանը։ 

Լիոն քաղաքի տուրիզմի գրասենյակի և տեղեկատվական կենտրոնի հետ պարբերաբար տարվում են աշխատանքներ, քանի որ տուրիզմի բաժինը նպատակ ունի 2017 թվականին ունենալ ինֆորմացիոն կենտրոն Երևանում։ 

«Առայժմ այդ ամենը նախագծային տեսքով է և նպատակ կա, որպեսզի այդ կենտրոններից մեկը լինի Երևան քաղաքի պատմության թանգարանում, քանի որ այդ թանգարանը բազմաթիվ զբոսաշրջիկների է ընդունում տարվա ընթացքում»,- հավելեց Երևանի քաղաքապետի օգնականը։ 

Նա կարևորեց նաև Ռուսաստանի, Չինաստանի և ԵՄ դերը, որոնք այն թիրախային ուղղություններն են, որոնց հետ մայրաքաղաքի ղեկավարությունը փորձում է ավելի սերտ աշխատել։