Վերջին մեկ ամսում Հայոց ցեղասպանության թանգարան այցելել է ավելի շատ թուրք, քան վերջին 15 տարվա ընթացքում

Հայոց ցեղասպանության 100-րդ տարելիցի միջոցառումների և ցեղասպանության թանգարան-ինստիտուտի գործունեության ամենահամեստ և ոգևորիչ արդյունքն ամեն օր թուրք զբոսաշրջիկների այցելությունն է թանգարան: Ինչպես լրագրողների հետ զրույցում այս մասին հայտնեց Հայոց ցեղասպանության թանգարան-ինստիտուտի տնօրեն Հայկ Դեմոյանը, վերջին մեկ ասմում ազգությամբ թուրք ավելի շատ այցելու է եկել, քան թանգարանի գոյության վերջին տասնհինգ տարիների ընթացքում: «Հայոց ցեղասպանության թանգարան թուրքերի այցն արդեն օրինաչափություն է: Ամենամեծ և տպավորիչ բանը մեզ համար նրանց լռություն է: Եթե նախկինում գալիս էին որոշակի թերհավատությամբ, հարցադրումներ ունեին, կասկածի տակ էին դնում, այսօր հարցերի առիթ չեն ունենում»,-«Արմենպրես»-ի փոխանցմամբ` ասաց Հայկ Դեմոյանը` ավելացնելով, որ որոշակիորեն հասել են նպատակին, այն է` ներազդել թուրք հանրության վրա, որ սկսեն խորհել ու հասկանալ, թե ինչու են աշխարհով մեկ տեղի ունենում նոր շղթայական գործողություններ միջազգային ճանաչման առումով, բայց իրենց սահմաններից ներս պարտադրվում է մեկ այլ բան: «Թե ինչու է Փարիզում, քառասունից ավելի քաղաքներում պետական մակարդակով ցուցադրություն կազմակերպվում, ինչու են պետական այրերը գալիս Ծիծեռանակաբերդ: Ինչուների համալիրը կբերի կարևոր նպատակի, որպեսզի մենք կարողանանք թուրքերի ապագա սերնդի շրջանում որոշակիորեն փոխել մոտեցումը, որպեսզի նախ և առաջ նրանք հասկանան, որ իրենց իշխանությունները կեղծում են իրականությունը»,-նշեց Հայկ Դեմոյանը:

Նրա խոսքով` արդեն կարող ենք լիակատար հաղթանակ արձանագրել ակադեմիական դաշտում: «ճիշտ է, թուրքական կողմը կշարունակի հովանավորել տարբեր գրքերի հրատարակում, նոր գրչակներ վարձել` տարաբնույթ ժխտողական աշխատանքներ հրապարակելու համար, բայց ակադեմիական դաշտում մեկընդմիշտ կարող ենք արձանագրել, որ թուրքական կողմն անելիք չունի որևէ նոր հեղաշրջող կամ կարծիքներ փոխող տեսակետներ ամրագրելու գործում: Դրա վկայություններից էր նաև Ցեղասպանագետների միջազգային ընկերակցության համաժողովը հենց Երևանում անցկացնելը, որ շատ կարևոր էր»,-շեշտեց Հայկ Դեմոյանը:

Երևանում ընթանում է «Հիշում եմ և պահանջում» փորձագիտական համաժողովը, որի ժամանակ ամփոփվում են Հայոց ցեղասպանության 100-րդ տարելիցի միջոցառումների արդյունքները: