ՀՀ պետական գնումներում ԵԱՏՄ անդամ երկրների ապրանքների նկատմամբ առավելությունները կարող են հանվել

ԵԱՏՄ պայմանագրաիրավական դաշտը պահանջում է, որ միության անդամ երկրներից որևէ մեկի պետական գնումներում խտրականություն չկիրառվի միության անդամ երկրների ապրանքատեսակների նկատմամբ: Այսինքն` եթե ՀՀ-ն իրականացնում է պետական գնումներ և այնտեղ ներկայացված են ԵԱՏՄ անդամ երկրների արտադրության ապրանքները, ապա բոլորի համար միևնույն պայմանները պետք է առաջադրվեն և կիրառվեն: ՀՀ ֆինանսների նախարար Վարդան Արամյ անի կարծիքով, սակայն, այդ պահանջն իր նպատակին չի ծառայում, քանի որ ինչպես նպաստում են ՀՀ տնտեսավարողներին և ռեզիդենտներին, այնպես էլ այդ գործիքակազմով  առավելություն է տրվում ԵԱՏՄ անդամ այլ երկրների կողմից արտադրվող ապրանքներին, ինչը Հայաստանի համար ևս ներմուծում է:

«Ենթադրենք ես 15 տոկոսով ավելի ղազախական արտադրության ապրանքներ եմ գնում` հարց է առաջանում, թե ինչի համար ես պետք է դա անեմ, եթե կարելի է նույն որակի եվրոպական ապրանք գնել, որը ավելի էժան կլինի և կբավարարի իմ պահանջները: Այս տեսանկյունից կարծում ենք, որ այդ գործիքը ներքին տնտեսավարողներին օժանդակելու համար լավը չէ, քանի որ դրանից օգտվելու են նաև արտաքին այլ տնտեսավարողներ: Կարծում ենք, որ մեր նվազ ռեսուրսների պայմաններում դրանք պետք է ավելի նպատակային օգտագործվեն»,- «Արմենպրես»-ի հաղորդմամբ՝ ասաց նախարարը` հավելելով, որ ԵԱՏՄ երկրների հանդեպ առավելությունը հանելու են, ամենայն հավանականությամբ, կառավարության հաջորդ նիստում: