Մայր Աթոռ Սուրբ Էջմիածնում կայացել է Վարդապետական թեզերի պաշտպանություն

ՀԱՍԱՐԱԿՈՒԹՅՈՒՆ 25 Սեպտեմբեր, 2015 14:38

Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի օրհնությամբ սեպտեմբերի 25-ին Մայր Աթոռ Սուրբ Էջմիածնի Գևորգյան հոգևոր ճեմարանի հանդիսությունների դահլիճում տեղի է ունեցել վարդապետական թեզերի բանավոր պաշտպանություն:

Ինչպես տեղեկացրին Մայր Աթոռի տեղեկատվական համակարգից, հանձնաժողովը նախագահել է Մայր Աթոռի եկեղեցական հայեցակարգային հարցերի գրասենյակի տնօրեն, Տավուշի թեմի առաջնորդ Գերաշնորհ Տ. Բագրատ եպիսկոպոս Գալստանյանը։ Հանձնաժողովի կազմում ընդգրկված են եղել Արագածոտնի թեմի առաջնորդ Գերաշնորհ Տ. Մկրտիչ եպիսկոպոս Պռոշյանը և Մայր Աթոռի հոգևոր-կրթական հաստատությունների վերատեսուչ Գերաշնորհ Տ. Գևորգ եպիսկոպոս Սարոյանը:

Մասնավոր վարդապետության աստիճանի համար թեզեր են պաշտպանել Մայր Աթոռ Սուրբ Էջմիածնի միաբաններ Քրեակատարողական հիմնարկների հոգևոր տեսուչ Հոգեշնորհ Տ. Ռուբեն աբեղա Զարգարյանը («Հիսուս Մարկոսի Ավետարանում»), Գեղարքունիքի թեմի առաջնորդական տեղապահ Հոգեշնորհ Տ. Կիրակոս աբեղա Դավթյանը («Հայկական և ռուսական եկեղեցական տոների ժողովրդական արարողությունների համեմատական քննությունը»), Մայր Աթոռի փոխդիվանապետ Հոգեշնորհ Տ. Պարթև աբեղա Բարսեղյանը («Կարապետ եպիսկոպոս Տեր-Մկրտչյանի մանկավարժական հայացքները» ), Մայր Աթոռի Կադրերի բաժնի տնօրեն Հոգեշնորհ Տ. Կյուրեղ աբեղա Դավթյանը («Դավանաբանական վեճերը երրորդ դարի կեսերին և դրանց արձագանքը հայ դավանաբանական գրականության մեջ»), Հունաստանի հայոց թեմի առաջնորդական տեղապահ Հոգեշնորհ Տ. Խորեն աբեղա Առաքելյանը («Բյուզանդական Եկեղեցու հարցում-մեղադրանքները և Հայոց Եկեղեցու հայրերի պատասխանները` ըստ հայկական աղբյուրների (Խաչի պաշտամունքի, Ս. Սարգսի տոնի և մատաղի օրինակով)»), Մայր Աթոռի Գևորգյան հոգևոր ճեմարանի տեսուչ Հոգեշնորհ Տ. Գարեգին աբեղա Համբարձումյանը («Սիրաքի Իմաստության հայերեն թարգմանությունը») և Հառիճավանքի Թրբանճյան ընծայարանի տեսուչ Հոգեշնորհ Տ. Նշան աբեղա Հմայակյանը («Կողոսացիս Ա. 15-20 քրիստոսաբանական օրհներգությունը. վերլուծության փորձ»):

Առաջիկայում, Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի օրհնությամբ, Հայր Սուրբերը Օշականի Ս. Մեսրոպ Մաշտոց եկեղեցում նրանք տվչության հատուկ արարողությամբ կստանան մասնավոր վարդապետության աստիճան: