«Ռեժիսորները խիստ սխալվում են, եթե կարծում են, որ ես չեմ կարող լուրջ դերեր խաղալ». Գոռ Մարտիրոսյան

Exclusive

Past.am-ը շարունակում է գտնել սիրված հեռուստասերիալների «կորած» հերոսներին: Այս անգամ մեր զրուցակիցը «Բանակում» և «Քաղաքում» հեռուստասերիալներում Թոռնիկ Ջամշոյանին մարմնավորած Գոռ Մարտիրոսյանն է:

- «Բանակում»-ի Ձեր կերպարը բավականին դրական, էմոցիոնալ էր: Ու՞մ գաղափարն էր այդպիսի կերպար ստեղծելը և արդյոք հաճույքո՞վ էիք խաղում Ձեր դերը:

- Շատ սիրել եմ կերպարս, որն ինձ մեծ հաջողություն բերեց: Մտահղացումը սցենարիստինն էր, որ Ջամշոյանը լինի եզդի ազգի ներկայացուցիչ, մնացած ամեն ինչը ես եմ որոշել. ինչպես խոսել, պահել ինձ, իհարկե, ռեժիսորների ցուցումներով, նրանց իմացությամբ:

- Իրական կյանքում Ձեր կերպարին նմա՞ն եք:

- Բացարձակ: Պարզապես ուրիշ ձայնով չէի կարող խաղալ, միայն ձայնն է նույնը:

-Ինչպես գիտենք, Դուք նաև հանդիսություններ եք վարում: Ի՞նչն էր պատճառը, որ սկսեցիք այդ գործով զբաղվել:

- Շատ վաղուց եմ զբաղվում այդ գործով: Կոնկրետ պատճառ չկա, նպատակն արդարացնում է միջոցները: Ժողովուրդն ինձ սիրում է, ես էլ, առիթից օգտվելով, արեցի այն, ինչի պահանջարկն այսօր մեծ է, ինչի միջոցով մարդիկ կարողանում են վաստակել:

-Դերասանի կարիերան մի կո՞ղմ եք դրել, թե՞ նորություններ սպասենք Ձեզնից:

- Իհարկե, մի կողմ չեմ դրել, պարզապես մարդիկ մտածում են, որ եթե ես հումորային դեր եմ խաղացել, լուրջ դերեր չեմ կարող խաղալ: Բայց չեն պատկերացնում, որ նույնիսկ այդ հումորային դերերը ես շատ լուրջ եմ խաղացել: Այսօրվա ռեժիսորները խիստ սխալվում են, եթե կարծում են, որ ես չեմ կարող այլ ժանրերում հանդես գալ: Երևի այդ է պատճառը, որ ներկա պահին նոր առաջարկներ չունեմ:

-Կարծում եմ՝ շատերին նաև Ձեր անձնական կյանքն է հետաքրքրում: Ինչպես գիտենք, ամուսնացել եք տարիքով Ձեզնից բավական փոքր աղջկա հետ: Արդյոք դա չի՞ խանգարում ընտանեկան հարաբերություններում:

- Բացարձակ չի խանգարում: Մենք շատ լավ ընկերներ ենք, այդ տարբերությունը չենք էլ նկատում:

- Ըստ Ձեզ՝ Դուք լա՞վ ամուսին եք:

- Կինս ասում է՝ ամենալավն եմ, ի՞նչ իմանամ: Եթե ասում է ...

- Ձեր ընտանիքում առաջիկայում համալրումներ սպասվու՞մ են:

- Դեռ ոչ: Տղաս շուտով 6 ամսական կլինի: Բայց նպատակներ, իհարկե, կան: 3 տղան պարտադիր է, դրանից հետո կորոշեմ՝ աղջիկ կլինի, թե՞ տղա:

 

- Քանի որ շուտով սիրահարների տոնն է, ինչպե՞ք եք պատրաստվում անցկացնել այն:

- Հատուկ ինչ-որ բան չենք պատրաստվում անել, երևի երկուսով կգնանք մի տեղ, կնստենք, միասին ժամանակ կանցկացնենք:

 Ի դեպ, այսօր սիրված դերասանի կնոջ ծննդյան օրն է: Past.am-ի խմբագրակազմը ևս շնորհավորում է և մաղթում առողջություն ու ընտանեկան ջերմություն:

Հարցազրույցը՝ Մարիամ Նալբանդյանի