Լապշինի արտահանձնման վերաբերյալ պետք է ինստիտուցիոնալ մոտեցում ցուցաբերել

Ցանկացած երևույթ, որը վերաբերում է Լեռնային Ղարաբաղի Հանրապետությանը կամ կոնտեքստի մեջ կան այդ բառերը, Հայաստանի Հանրապետությանը հետաքրքրում է։ 
«Արմենպրես»-ի հաղորդմամբ, այս մասին ասաց ԱԺ «Ժառանգություն» խմբակցության պատգամավոր ԹևանՊողոսյանը և հավելեց, որ լրիվ այլ հարց է, թե մենք ինչպես ենք օգտագործում այդ երևույթը մեր շահերն առաջ տանելու համար։ 
«Մի կողմից՝ մենք, իհարկե, կարող ենք ասել, որ Լապշինը ՀՀ քաղաքացի չէ, վատ չէր վարձատրվում իր գրած պատմությունների համար, տարբեր անձնագրեր օգտագործելով, իր շահերից ելնելով՝ փորձել է ինչ-որ գործողություններ անել, առերեսվել է քրեական գործընթացների հետ, և մեզ ինչո՞ւ պետք է նա հետաքրքրի: Բայց եթե հարցը դիտարկում ենք հայկական շահերի տեսանկյունից և ինքներս մեզ հարցնում ենք, թե ինչպե՞ս են որևէ մի երևույթ մեր թշնամիները մեր դեմ օգտագործելու, ապա պետք է մտածենք, թե ի՞նչ պետք է անենք, որպեսզի նմանատիպ իրավիճակներ չլինեն և չձևավորվեն նմանատիպ հնարավորություններ։ Այստեղ գալիս է մի կարևոր խնդիր, որը մեր պետական մտածելակերպի մեջ պետք է տեղ կգնի»,- ասաց պատգամավորը: 

«Ինձ հիմա մի հարց է հետաքրքրում՝ ինչպիսի՞ դասեր ենք մենք քաղելու և ի՞նչ քայլեր ենք անելու մեր պետականաշինության և հայկական շահերն առաջ տանելու համար»,- ասաց նա: 

Թևան Պողոսյանը նշեց, որ այն օրը, երբ Ռամիլ Սաֆարովին արտահանձնեցին Հունգարիայից Ադրբեջան, պետք է սկիզբը դառնար, որ Հայաստանի կառավարությունը կամ պետական մարմինները նիստ հրավիրեին ու ասեին, որ այսօրվանից հետո իրենք պետք է նոր ինստիտուտ ներմուծեն իրենց աշխատանքի մեջ՝ սցենարների ծրագրավորում։ «Պետք է փորձենք նախապատրաստվել նմանատիպ իրավիճակների, եթե մի այլ երկրում լինի, գործողությունների ինչ փաթեթ ենք պատրաստելու։ Ռազմական մոտեցումներում կա այդ սցենարների ծրագրավորումը։ Պատերազմ հայտարարեցին, այդ փաթեթը հանում ենք և սկսում ենք գործողություններ գրել։ Նույնը պետք է կարողանանք անել նաև արտաքին հարաբերություններում»,- նկատեց պատգամավորը։ 

Ինչ վերաբերում է Բելառուսում ՀՀ արտակարգ և լիազոր դեսպան Արմեն Խաչատրյանի հայտարարություններին, թե ոչինչ չի կարողացել անել, Թևան Պողոսյանի կարծիքով, դրանք վկայում են այն մասին, թե ինչպիսի վերաբերմունք է եղել հայկական պետական համակարգում: Իր կարծիքով, դեսպանը պետք է ձևավորեր այնպիսի իրավիճակ, որտեղ հայկական շահերը վեր կդասեին, քան ինչ-որ մեկի արտահանձնումն ու խնդիրները։ 
«Ժառանգություն» խմբակցության պատգամավորը նաև նշեց, որ մինչև որևէ երկիր չիմանա, որ հայկական շահերը ոտնահարելով ունենալու է խնդիրներ, ցանկացած երկիր դրանք կանտեսի՝ լինի հզոր, թե փոքր երկիր: «Ես կարծում եմ, որ մենք, ոչ միայն Լապշինի այս մի դեպքի մասին պիտի մտահոգվենք, այլ նաև պետք է կարողանանք նայել, թե, օրինակ, այս շաբաթվա մեջ որքան այլ խնդիրներ են եղել Արցախի հետ կապված։ Մենք պետք է փորձենք ինստիտուցիոնալ մեխանիզմներ ձևավորելով՝ այնպես անել, որ այլևս այսպիսի բաներ չկրկնվեն»,- նշեց Պողոսյանը։ 

«Մենք ոչ Սաֆարովի դեպքից հետո ենք դասեր քաղել, ոչ էլ մնացած այլ դեպքերից։ Ես կողմ եմ ինստիտուցիոնալ և համակարգային մոտեցմանը»,- ընդգծեց պատգամավորը։ 

Բելառուսի Գերագույն դատարանը փետրվարի 7-ին մերժել է Ռուսաստանի և Իսրայելի քաղաքացի, բլոգեր Ալեքսանդր Լապշինիբողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվեր Ադրբեջան: Լապշինը նույն օրը հատուկ չվերթով տեղափոխվել է Մինսկից Բ աքու՝ պետական անվտանգության ծառայությանաշխատակիցների ուղեկցությամբ: Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով: Երկու հոդվածներով Լապշինին սպառնում է մինչև 5 տարվա ազատազրկում: