Գյումրիում նշեցին ավանդական դարձած «Գյումրու ձմեռ» միջոցառումը

Գյումրու «Մայր Հայաստան» հուշահամալիրի տարածքում փետրվարի 11-ին նշվեց ավանդական դարձած «Գյումրու ձմեռ» միջոցառումը: Ինչպես անցած տարի,  այս տարի ևս այն համընկավ երիտասարդների և սիրո բարեխոս Սուրբ Սարգսի տոնի հետ և մարզական միջոցառումները համեմվեցին մշակութային ու ազգային տարրերով: Գյումրու քաղաքապետարանի նախաձեռնությամբ միջոցառմանը մասնակցում էին  քաղաքապետարանի ենթակայության տակ գործող մանկապարտեզները, մարզական և մշակութային հաստատությունները, քաղաքի դպրոցները և հարյուրվոր գյումրեցիներ, ովքեր եկել էին մասնակից լինելու հետաքրքիր մարզամշակութային միջոցառման: Պարանի ձգում, շախմատ, դահուկավազք,  վոլեյբոլ, շախմատ  և այլ մարզաձևերի մրցումներ անցկացվեցին մշակութային համույթների և անհատ կատարողների ելույթների ներքո, իսկ ձմեռային տեսարանը տեղում իրենց կտավներին էին հանձնում Գյումրու Մերկուրովի անվան նկարչական դպրոցի սաները: Ամենուր նաև հյուրասիրություն էր՝ ներկաներին բաժանվեցին աղի բլիթներ:

Միջոցառմանը մասնակցում էին թեմակալ  առաջնորդ Միքայել Եպիսկոպոս Աջապահյանը, Շիրակի մարզպետ Հովսեփ Սիմոնյանը, Գյումրու քաղաքապետ Սամվել Բալասանյանը, փոխմարզպետներն ու փոխքաղաքապետերը և այլք:

Գյումրու քաղաքապետ Սամվել Բալասանյանն ու  Շիրակի մարզպետը  ողջունեցին  ու շնորհավորեցին ներկաներին՝ մաղթելով բոլորին տոնական բարձր տրամադրություն ու ակտիվ մասնակցություն միջոցառումներին: Մարզական միջոցառումներից ու խաղ-մրցույթներից բացի, ինչպես Գյումրու այնպես էլ մարզի որոշ համայնքների դպրոցները փորձել էին ներկայանալ ճոխ հյուրասիրությամբ՝ ամեն մեկը յուրովի ներկայացնելով տոնի մասին իր պատկերացումը: Այս անգամ եղանակը բարեհաճ էր ակտիվ հանգստի բոլոր սիրահարների համար և օրն  իրոք  տոնական էր։