Քանի դեռ չենք հասել փաստաթղթային ձևակերպումների, Ադրբեջանը շարունակելու է իր պահվածքը. Լարիսա Ալավերդյան

Tert.am-ը գրում է.

«Ընդդեմ իրավական կամայականությունների» ՀԿ գործադիր տնօրեն, ղարաբաղյան հարցով փորձագետ Լարիսա Ալավերդյանը, Tert.am-ի հետ զրույցում, անդրադառնալով ԼՂ հակամարտության կարգավորմանը և վերջին շրջանում սահմանի լարվածության աճին, նշեց, որ մինչև իրավիճակը քաղաքական դաշտում չփոխվի, մարտական դաշտում իրավիճակը մնալու է շատ լարված:

«Հայկական կողմը ապրիլի երկուսը չկարողացավ դարձնել սանկցիաների հիմք, թեև ավելի քան պարզ էր, թե ով է սկսել գործողությունները, սակայն դա չդարձավ փաստաթուղթ: Քանի դեռ չենք հասել փաստաթղթային ձևակերպումների, Ադրբեջանը շարունակելու է իր պահվածքը»,- ասաց նա:

Լարիսա Ալավերդյանը նշեց, որ մտահոգություն ունի, որ Ադրբեջանը կարող է նույն թափով սկսել նորից այդպիսի գործողություններ: «Կա մի վտանգ. հաշվի առնելով Շուշիի 25 ամյակը, բլոկադան, Ադրբեջանը շարունակելու է իր կետային սադրիչ գործողությունները, պետք է դրան պատրաստ լինել»,-ասաց նա և նշեց, որ Ադրբեջանը մի քանի անգամ էլ հայտարարել է, որ եթե չի ստացվում քաղաքական մեթոդներով խնդիրը լուծել, դա կանեն զինված մեթոդներով:

Ինչ վերաբերում է Հայաստանի և Ադրբեջանի արտաքին գործերի նախարարների հնարավոր հանդիպման կազմակերպմանը, ըստ Ալավերդյանի, քիչ ակնկալիքներ կան, քանի որ ո՛չ Վիեննայի, ո՛չ էլ Սանկտ Պետերբուրգի պայմանավորվածությունները չեն ընդունվել Ադրբեջանի կողմից՝ ո՛չ ստորագրությամբ, ո՛չ համաձայնությամբ:

«Այս առումով, կարծես, մեր և Ադրբեջանի՝ ո՛չ թե ստրատեգիական և նպատակային, այլ տակտիկական դիրքորոշման անջրպետը գնալով ավելի մեծանում է: Այսինքն՝ մենք խոսում ենք տարբեր դիրքերից, տարբեր նպատակներով և անգամ տարբեր լեզուներով»,- ասաց նա:

Ինչ վերաբերում է Մինսկի խմբի արձագանքներին, ապա արցախյան հարցով փորձագետն ասաց, որ Մինսկի խմբի դրական կողմն այն է, որ բոլոր դեպքերում գրեթե 20 տարի նրանք կարողացել են պաշտպանել այնպիսի խաղաղություն, այնպիսի իրավիճակ, որը շատ քիչ տեղերում է հաջողվել՝ առանց խաղաղապահ ուժերի: «Ես ասել եմ, որ օրինակելի է, երբ առանց խաղաղապահ ուժերի, ի վերջո, այդ խաղաղությունը, որակյալ թե անորակ, այլ հարց է, պահպանվում է»,- ասաց նա:

Լարիսա Ալավերդյանը խոսքով՝ Ալիևը շատ խնդիրներ ունի թե՛ ներսում, թե՛ դրսում, և փորձում է հաղթանակ տանել դիվանագիտական, իրավական դաշտերում: «Հիմա, կարծում եմ, որ պետք է հակամարտության հունը փոխել, այդ հիմնախնդրի լեզուն, շրջանակները փոխել»,- ասաց նա և նշեց, որ խնդրի կարգավորման հիմքը չպետք է լինեն Մադրիդյան սկզբունքները:

«Ծնված իսկ պահին այդ Մադրիդյան սկզբունքները մեռյալ վիճակում են, որովհետև դրանք Ադրբեջանի, Հայաստանի և Արցախի համար անընդունելի են: Այդ սկզբունքներն այնքան տեսական են, այնքան հեռու իրականությունից: Ես համոզված եմ, որ այդ հունը պետք է մենք փոխենք, որովհետև Մինսկի խումբն ասում է՝ մենք չենք լուծում խնդիրը, մենք ստեղծում ենք իրավիճակ, որտեղ կողմերը պետք է լուծեն»,- ասաց նա:

Լարիսա Ալավերդյանը դրական է համարում այն, որ անընդհատ միջազգային հանրությունից հնչում են հայտարարություններ, որ հարցի կարգավորումը խաղաղ լուծում պետք է ունենա, սակայն խնդիրն այն է, թե ինչպես, քանի որ «նրանք մազաչափ անգամ առաջ չեն շարժվել այս գործընթացում»: