«Միշտ հիասթափվում ես, հետո՝ քեզ հավաքում, գնում առաջ ու մոռանում». բացահայտում ենք Ելենա Բորիսենկոյին՝ բլից հարցերի միջոցով

ՀԱՐՑԱԶՐՈՒՅՑ 14 Փետրվար, 2017 13:41

Past.am-ը փորձել է բլից հարցերի միջոցով բացահայտել սիրված դերասանուհի Ելենա Բորիսենկոյին: Թե ինչքանով է դա մեզ հաջողվել, թողնում ենք Ձեր դատին:

- Ձեր օրը սկսվում է...

- Շներին տանում եմ Օպերայի հրապարակ՝ զբոսնելու: Ամռանը՝ առավոտյան 6-ին, ձմռանը՝ 7-ին:

- Ո՞վ կամ ի՞նչն է Ձեր ոգեշնչման աղբյուրը:

- Լավ երաժշտությունը, գիրքը, ֆիլմը, լավ մարդիկ:

- Գեղեցիկը Ձեզ համար...

- Նույնն է, ինչ սերը:

- Ու՞մ եք դիմում, երբ հուսահատ եք:

- Մայրիկիս:

- Կյանքում երբեք չեք ների...

- Կներեմ ամեն ինչ:

- Ձեր ամենամեծ հիասթափությունը...

- Չեմ կարող ասել, քանի որ միշտ հիասթափվում ես, հետո՝ քեզ հավաքում, գնում առաջ ու մոռանում:

- Մի բան, որի համար շատ եք փոշմանել:

- Փոշմանել եմ, որ 90 թվականին, երբ դպրոցն ավարտեցի, չգնացի Մոսկվայում սովորելու, այլ մնացի Երևանում:

- Ձեր կյանքի ամենառոմանտիկ հանդիպումը...

- Այո, եղել է. ֆանտաստիկ, ռոմանտիկ, աննորմալ, ոչ հայաստանյան:

- Երբ բարկացած եք...

- Շատ ծայրահեղ եմ. կա՛մ հիստերիկ բաներ եմ անում, կա՛մ լաց եմ լինում:

- Հայրենիքը Ձեզ համար...

- Գանգրահեր, կապուտաչյա երկիրն է, որն այլևս գոյություն չունի:

- Ամենաշատը երազում եք...

- Ապրել հենց այդ՝ իմ երազած երկրում:

- Երբեք չեք փորձի...

- Կփորձեմ ամեն ինչ:

- Աշխարհի լավագույն վայրը Ձեզ համար...

- Այն վայրն է, որտեղ քեզ սիրում են:

- Միշտ վախեցել եք...

- Չեմ վախենում:

- Տարվա ո՞ր եղանակի հետ եք Ձեզ ասոցացնում:

- Աշնան:

-Իր, որ միշտ Ձեզ հետ է:

- Երևի հեռախոսը: ))

- Երջանկության՝ Ձեր բանաձևը...

- Ներելը:

- Այս պահին կուզենայիք...

- Որ Ռոման Մուշեղյանն իր «Աղոթք» ֆիլմի նկարահանումները վերջացնի:

- Ի՞նչ հարցի կցանկանայիք պատասխանել, որը չհնչեց:

- Կարծես թե բոլոր հարցերը տվեցիք: ))

- Եվ վերջում...

- Ժպտացե՛ք:

Մարիամ Նալբանդյան