Թուրքիան ԱՄՆ-ից Գյուլենին արտահանձնելու գործով նոր զարգացումների ակնկալիք ունի

Պաշտոնական Անկարան ԱՄՆ նախագահ Դոնալդ Թրամփի պաշտոնավարման շրջանում դրական ակնկալիքներ ունի չափավոր իսլամի քարոզիչ Ֆեթուլլահ Գյուլենին արտահանձնելու հարցում: Ինչպես հաղորդում է «Արմենպրես»-ը` վկայակոչելով թուրքական «Հուրիեթ» պարբերականը, այս մասին հայտարարել է Թուրքիայի արդարադատության նախարար Բեքիր Բոզդաղը:

«Առաջիկայում կլինի հնարավորությունը հեռախոսազրույցի միջոցով կամ դեմ առ դեմ հանդիպման ժամանակ ԱՄՆ նոր արդարադատության նախարարին տեղեկացնել այս հարցում Թուրքիայի ակնկալիքների մասին, ինչպես նաև հայտնել այն, թե Գյուլենի և մյուս գյուլենականների վերադարձը Թուրքիայի համար ինչ նշանակություն ունի: Մենք այս հարցում նոր զարգացումներ ենք ակնկալում»,- ասել է Բոզդաղը: Նա նշել է, որ ԱՄՆ նախագահի պաշտոնը Թրամփի ստանձնելուց հետո իրենք Թուրքիայում ռազմական հեղաշրջմանը Գյուլենի մասնակցության մասին նոր ապացույցներ են ուղարկել Միացյալ Նահանգ ներ:

Չափավոր իսլամի քարոզիչ, «Հիզմեթ Հարեքեթի» ազդեցիկ կրոնական շարժման առաջնորդ Ֆեթուլլահ Գյուլենը որպես վտարանդի 1999 թվականից բնակվում է ԱՄՆ Փենսիլվանիա նահանգում: Թուրքիայի իշխանությունները նրան են մեղադրում երկրում հուլիսի 15-ի ռազմական հեղաշրջման փորձը կազմակերպելու մեջ և պահանջում ԱՄՆ իշխանություններից՝ արտահանձնել Գյուլենին:

74-ամյա Ֆեթուլլահ Գյուլենը նախկինում եղել է Էրդողանի մերձավոր կողմնակիցը և Թուրքիայի ներկայիս նախագահին օգնել է իշխանության գալ: Էրդողանը Գյուլենին մեղադրում է պետական հեղաշրջման փորձի և բարձրաստիճան պետծառայողների հեռախոսային խոսակցությունները զանգվածաբար լսելու գործը կազմակերպելու մեջ, որոնց մի մասի վերծանումն օգտագործվել է 2013 թվականի դեկտեմբերի 17-25-ին Թուրքիայում Էրդողանի որդու, դստեր, փեսայի և կառավարության 4 անդամների մասնակցությամբ մեծածավալ կոռուպցիոն գործողությունների բացահայտման համար: