««Ֆուլ հաուս»-ում կերպարս բավականին հետաքրքիր, բացվելու, աշխատելու հնարավորություն տվող է». Թամարա Պետրոսյան

Exclusive

Ինչպես արդեն տեղեկացրել ենք, փետրվարի 6-ին մեկնարկել են «Ֆուլ հաուս» սիթքոմի նոր եթերաշրջանի նկարահանումները: Ինպես նախորդ եթերաշրջաններում, այս անգամ էլ հիմնական դերասանական կազմին կավելանան նոր կերպարներ:

Past.am-ը զրուցել է սիրված դերասանուհի Թամարա Պետրոսյանի հետ, ով այս եթերաշրջանում սիթքոմի նոր կերպարներից մեկում է հանդես գալու:

- Ինչպե՞ս եղավ, որ սկսեցիք նկարահանվել «Ֆուլ հաուս»-ում:

- Առաջարկը դասական տարբերակով եմ ստացել. զանգեցին, կանչեցին փորձնական նկարահանման, գնացի, նկարահանվեցի, անցա և այդպես:

- Արդեն մի քանի օր է, ինչ սկսվել են նկարահանումները: Ընդհանուր մթնոլորտն ինչպիսի՞ն է, արդեն հարմարվե՞լ եք:

- Նկարահանումներն արդեն սկսվել են, բայց իմ մասնակցությամբ կտորներ դեռ չկան, դեռ նկարահանման հրապարակում չեմ եղել, բայց մի քանի օրից կսկսեմ աշխատանքը:

- Մինչև հրավեր ստանալը սիթքոմին հետևու՞մ էիք: Ի՞նչ կարծիք ունեք:

- Եթե չհավանեի, ես երբեք համաձայնությունս չէի տա: Ըստ իս՝ «Ֆուլ հաուսն» այս պահին մեր հեռուստադաշտի լավագույն նախագծերից է՝ բոլոր առումներով: Ընդհանուր առամամբ, որպես պրոյեկտ, այն ինձ շատ է դուր գալիս՝ ոչ միայն որպես մասնագետ, այլ նաև՝ որպես հեռուստադիտող: 

- Մի փոքր կերպարից խոսենք՝ առանց չակերտները բացելու: 

- Անկեղծ ասած՝ կերպարիս մոտավորապես եմ ծանոթ, դեռ ռեժիսորի հետ էլ չեմ հանդիպել: Առաջարկը հաստատվելուց անմիջապես հետո մենք մեկնեցինք Թեհրան՝ հյուրախաղերի, և ես միայն երեկ եմ վերադարձել: Մոտ օրերս ամեն ինչ կհստակեցվի:

- Որպես կանոն՝ «Ֆուլ հաուս»-ի նոր կերպարները, հների համեմատությամբ, այնքան էլ չեն ընդունվում ու սիրվում հեռուստադիտողի կողմից: Մտավախություն չունե՞ք, որ Ձեր կերպարն էլ կարող է այդ բախտին արժանանալ:

- Ճիշտն ասած՝ չգիտեի, որ նման կարծրատիպ գոյություն ունի, բայց եթե այդպես է, կզգուշանամ: Անկեղծ ասած՝ ժամանակի առումով միշտ չի հաջողվել հետևել սիթքոմին, բայց նորի ու հնի տարանջատում չեմ մտցրել: Խնդիրն ավելի շատ լավի ու վատի մեջ է: Որպես հեռուստադիտող կարող եմ ասել, որ եթե կերպարը լավն է, անպայման կսիրվի: 

- Ինչքանով արդեն ծանոթ եք, ինքներդ հավանու՞մ եք Ձեր կերպարը:

- Այո, ինչքանով հասցրել եմ ծանոթանալ, բավականին հետաքրքիր, բացվելու, աշխատելու հնարավորություն տվող կերպար է:

- Հանդիսատեսը սովոր է Ձեզ ավելի շատ մեծ էկրանին տեսնել: Այս տարի ֆիլմերում նկարահանվելու առաջարկներ ունե՞ք:

- Ամեն ինչ դեռ հարցականների մեջ է, չեմ ուզում դեռ խոսել դրա մասին: Առաջարկներ միշտ էլ լինում են, համաձայնությունն է ավելի դժվար լինում:

- Թատրոնի աշխատանքը մի կո՞ղմ եք դրել, թե՞ զուգահեռ խաղում եք:

- Ոչ, մի կողմ չեմ թողել, այս ամենը համատեղում եմ Նարեկ Դուրյանի «Բոհեմ» թատրոնում ներկայացումների հետ: 

Մարիամ Նալբանդյան