Բյուրեղավանում միայնակ մայրը, 3 անչափահաս երեխաներն ու հաշմանդամ տատիկը հայտնվել են փողոցում (տեսանյութ)

Կոտայքի մարզի Բյուրեղավան քաղաքում միայնակ մայրն ու երեք անչափահաս երեխաները հայտնվել են փողոցում: Tert.am-ի հետ զրույցում ընտանիքի մայրը՝ Նարինե Մարգարյանն ասաց, որ արդեն մի քանի օր է՝ դրսում է հայտնվել, որովհետև չի կարողացել վճարել այն բնակարանի վարձը, որտեղ մինչ այս ապրել է: 

«Վարձով բնակարանում ապրում էի երեք երեխաներիս՝ Կարենի, Արմինեի, Նարեկի և մեր տատիկի հետ, ով հաշմանդամ է: Արդեն 6 ամիս է չեմ կարողացել վճարել տան վարձը, հենց այդ պատճառով էլ տան տերը մեզ դուրս է հանել բնակարանից»,-պատմեց Նարինե Մարգարյանը:

Վերջինիս խոսքով՝ սեփականատերը մի քանի ժամ ժամանակ է տվել բնակարանը լքելու համար, իսկ ինքը, երբ գնացել է մեկ այլ անձի մոտ, որպեսզի խնդրի, որ թույլ տան ապրել այդ տարածքում, վերադարձել և տեսել է, որ հաշմանդամ կնոջը դուրս են հանել և թողել դրսում: 

«Բացի այն, որ մնալու տեղ չունեմ, բոլոր փաստաթղթերս, անձնական իրերս ու մեր հագուստները գտնվում են այդ բնակարանում: Տան տերն ասաց, որ երբ գումարը կվճարեմ, այն ժամանակ էլ իրերս կստանամ»,-ասաց Մարգարյանը, ում հարևանները 3 օրով մեկ սենյակ են տրամադրել, որ դրսում չցրտահարվեն։

Նարինե Մարգարյանի ամուսինը վերջերս է մահացել, ընտանիքի միակ եկամուտը երեխաներին հասնող 36 000 դրամ նպաստ է և ընտանիքի տատիկի կենսաթոշակը: Դրսում հայտնված ընտանիքը կացարան ապահովելու հարցով պատկան մարմիններին չի դիմել. «Միևնույն է՝ չեն օգնի»: 

13-ամյա Կարեն Մարգարյանն էլ մեկ երազանք ունի՝ չմնալ դրսում, իսկ երբ մեծանա, ցանկանում է զինվոր դառնալ:

Առավել մանրամասն՝ տեսանյութում: