Ինչ գիրք կարդալ. խորհուրդ են տալիս հայ հայտնիները

Այսօր  լրանում է հայ մեծանուն բանաստեղծ Հովհաննես Թումանյանի 148-ամյակը, և արդեն 8-րդ տարին է, որ փետրվարի 19-ը  նշվում է որպես  գիրք նվիրելու օր:

BlogNews.am-ը գիրք նվիրելու օրվա հետ կապված զրուցել է հայ հայտնի լրագրողների և հեռուստադեմքերի հետ և պարզել՝ ինչ են նրանք կարդում և ինչ գրքեր խորհուրդ կտան ընթերցասերներին:

Հեռուստա-ռադիո հաղորդավարուհի Լուսինե Բադալյանին   կարդացած բոլոր գրքերի մեջ ամենաշատը տպավորել է կանադահայ գրող Հակոբ Խաչիկյանի և  ֆրանսիացի գրող Ժան-Իվ Սուսիի «Ամառ առանց այգաբացի» վեպը: Հաղորդավարուհին գիրքն առաջին անգամ տարիներ առաջ է կարդացել, բայց շատ անգամներ է վերընթերցել. «Սա այն գիրքն է, որն անընդհատ ուզում ես նորից կարդալ,  նորից անցնել նույն ճանապարհներով, նույն տեղերում լինել, վերհիշել ինչ-որ դրվագներ, ապրել հերոսների կյանքով: Գրքի ազդեցությունը քեզ բաց չի թողնում»:

Լուսինեն այս գրքի համարժեքը դեռ չի գտել: Առաջին հայացքից թվում է, թե գիրքը ցեղասպանության մասին է, բայց այն ցեղասպանության ֆոնին հայ  ընտանիքի կյանքի մասին է: Խոսվում է ընտանեկան բոլոր խնդիրների մասին, որոնք մենք շատ հաճախ չենք խոստովանում: Գրքում կա  և՛ սեր, և՛ բռնություն, և՛ հավատարմություն, և՛ դավաճանություն: Ամեն բան  այնքան իրատեսական ու գեղեցիկ լեզվով է գրված, որ կարդալիս չես ուզում նույնիսկ շնչել:

«Արմնյուզ» հեռուստաընկերության տնօրեն Հրաչ Քեշիշյանը խորհուրդ է տալիս Սերգեյ Դովլաթով կարդալ:  Նրա աշխատասենյակում կային Դովլաթովի գրեթե բոլոր գրքերը:

«Դովլաթովը նաև ճանապարհորդելիս է ինձ հետ: Նրան  անընդհատ  կարող ես վերընթերցել, և ամեն անգամ նորովի, ամեն անգամ ինչ-որ նոր բան գտնել»:

«Արմենիա» հեռուստաընկերության լուրերի մեկնաբան Էռնա Էլիզբարյանը խորհուրդ է տալիս անպայման ընթերցել Պարույր Սևակ: Սևակը Էռնայի սեղանի գիրքն է: Այն ամենը ինչ կապված է Սևակի հետ նրան շատ հոգեհարազատ է, նա սիրում է բանաստեղծի գրիչը և մտածողությունը. «Սևակը ինձ սովորեցրեց ենթատեքստը ավելի շատ  հասկանալ: Սիրում եմ նրա գրած քննադատական բոլոր հոդվածները, որովհետև սուր գրիչ ունի, ամեն ինչ գրված է գեղարվեստական և իրատեսական հիմքի վրա: Կա  սեր, ճշմարտախոսություն և կյանք: Սևակը եզակի է ինձ համար»:

«Մասնագիտությունը` լրագրող» հեղինակային հաղորդման լրագրող և հաղորդավարուհի Սոնա Աբրահամյանն ընթերցողներին խորհուրդ տալու համար ընտրել է Հալեդ Հոսեյնի  «Օդապարիկ թռցնողը»  կամ ռուսերեն թարգմանությամբ`«Бегущий за ветром» գիրքը:  Այս գիրքը պետք է կարդալ հստակ հասկանալով, որ Հոսեյին շատ նուրբ,  առանց ավելորդ մելամաղձոտության և խճճված այլաբանությունների մարդկային ճակատագրեր ներկայացնելու վարպետ է: Շատ են շեշտում  այս գրքի քաղաքական ենթատեքստը, թե ինչպես է հեղինակը ներկայացրել Աֆղանստանը, արդյոք այն շատ հեռու չէ իրականությունից: Սոնան խորհուրդ է տալիս քաղաքական ենթատեքստը երկրորդ պլան մղել և ավելի շատ մարդկային ճակատագրերով հետաքրքրվել:  

«Արմենիա» հեռուստաընկերության եղանակի տեսության մեկնաբան Լիլի Հովերը խորհուրդ է տալիս կարդալ Գրիգոր Նարեկացու «Մատեան Ողբերգության»-ը: Այս գիրքը միշտ հաղորդավարուհու սեղանին է, և նա պարբերաբար վերընթերցում է այն:

««Մատեան Ողբերգության»-ը համաշխարհային գլուխգործոց է,-նշում է հաղորդավարուհին,- այս գրքի մասին միշտ է պետք հիշել։ Այն մեր հպարտությունն է, մեզ միջնադարից հասած մեծ ժառանգությունը, մեր անգին զարդը։ Այն հայտնի է նաև իր հրաշագործ բուժիչ հատկություններով: Մարդիկ մինչև օրս բժշկվում են այս տողերով...Իսկ, ժամանակակից դարում, երբ խառնվել են «ընդունելին և անոմալը» մեզ միշտ է պետք մաքրել հոգին և միտքն այս «Գիրք գրքոց»-ով»։

Հաղորդավար Գոռ Գրիգորյանը /Եգոր Գլումով/  այս պահին կարդում է Հելեմ Բալագեի «Մեսսի» գիրքը, որովհետև շատ է սիրում հայտնի  ֆուտբոլիստին:  

«Երիտասարդներին խորհուրդ եմ տալիս կարդալ գիրք, շատ կարդալ, և կապ չունի, թե ինչ եք կարդում, կարևորը՝ կարդաք, և կապ չունի՝ որ տարիքում կլինի գրքի հետ ձեր ծանոթությունը: Մարդ կա 35 տարեկանում է իր համար բացահայտում ընթերցանության հրաշալի աշխարհը, մարդ էլ կա 5 տարեկանից է կարդում »:

«Մասնագիտությունը` լրագրող» հեղինակային հաղորդման լրագրող և հաղորդավարուհի Աելիտա Չիլինգարյանը, լինելով Հնդկաստանի և հնդկական մշակույթի սիրահար,  իր ընթերցած բոլոր գրքերից հատկապես առանձնացնում է Գրեգորի Ռոբերթսի «Շանտարամ»-ը:

«Շանտարամ»-ը բավականին ծավալուն ստեղծագործություն է և  այն կարդալուց առաջ պետք է տրամադրվել, որովհետև այն չի կարելի ընդհատումներով կարդալ: Նույնիսկ 1-2 շաբաթ չի կարելի դադար տալ:  Պետք է մտնես գրքի մեջ, ապրես, կարդաս ու վերջացնես: Սա մի հրաշալի պատմություն է մարդու կյանքի մասին: Տարբեր կերպարների կյանքի պատմությունները խառնված են  հետաքրքիր փիլիսոփայական մտքերով, ու կարդալու ընթացքում հասկանում ես, որ քեզ ոչ  միայն արտասովոր ու իրադարձություններով լի պատմություն են ներկայացնում, այլ նաև հետաքրիր մտքեր և կյանքի հանդեպ վերաբերմունք:

Աելիտան գրքից առանձնացնում է «Կյանքում ամեն ինչ կարող ես փոխել մի մտքով կամ արարքով, կարևորը՝ այն սիրով անես» միտքը:

BlogNews.am կայքի գլխավոր խմբագիր Կոնստանտին Տեր-Նակալյանի կարծիքով ընթերցանությունը պետք է լինի ոչ միայն գեղեցիկ ու գիտահանրամատչելի, այլ նաև հումորով. «Այդ առումով  ամենալավ ընտրություններից մեկը Իլֆի և Պետրովի աշխատություններն են, ովքեր ունեն փայլուն հետհեղափոխական հումորի ու երգիծանքի ոճ»:

Կոնստանտինը մեծ հաճույքով արդեն մի քանի անգամ վերընթերցել է թե՛  «12 աթոռը», թե՛ «Ոսկե ցլիկը»: Ամեն անգամ վերընթերցելիս կարելի է նոր զուգահեռներ գտնել մեր իրականության հետ:

Բոլոր նրանց, ովքեր հետաքրքրվում են քաղաքագիտությամբ, Մերձավոր Արևելքով կամ ընդհանրապես Արևելքով, «Արմենիա» հեռուստաընկերության մարզական մեկնաբան Էդուարդ Քալանթարյանը խորհուրդ է տալիս ընթերցել Աբրահամ Գասպարյանի «Ներքաղաքական գործընթացների իրողությունները Մերձավոր Արևելքում» գիրքը: Ինչու հենց այս գիրքը, որովհետև Արևելքի մասին գրողը պետք է ներսից և շատ լավ ճանաչի Արևելքը, իսկ Աբրահամ Գասպարյանը շատ լավ տիրապետում է թեմային և ամեն ինչ շատ լավ է ներկայացրել: