«Համոզված եմ, որ այս եթերաշրջանի հաղթողն իմ տղաներից մեկը կլինի». Շուշանիկ Արևշատյան

«Իքս ֆակտորը» շարունակում է իր հաղթարշավը Հայաստանում: Ինչպես նախորդ երեք եթերաշրջաններում, այս անգամ էլ արձագանքն ու մեկնաբանությունները նախագծի վերաբերյալ շատ են ու տարբեր:

Սակայն մի բանում շատերն են համակարծիք. այս եթերաշրջանում ամենաուժեղը մեծահասակների խումբն է, որի ղեկավարումը վստահված է «Ռադիո Վան» ռադիոկայանի տնօրեն Շուշանիկ Արևշատյանին: 

 

Past.am-ը  զրուցել է վերջինիս հետ՝ պարզելու, թե անձամբ պրոդյուսերն ինչ կարծիքի է իր թիմի մասին.

«Իհարկե, ես շատ գոհ եմ իմ խմբից: Ինչպես կարող եմ գոհ չլինել, երբ, ինչպես ասում են, իմ ձեռքով եմ իրենց հատ-հատ ընտրել: Ու կարևորն այն է, որ ես գիտեմ, թե ինչու եմ հենց նրանց ընտրել: Ոճային առումով նրանք շատ տարբեր են, ու ինձ դուր է գալիս այդպես աշխատելը. ոճապես միանման երգիչների հետ աշխատելն ինձ համար այնքան էլ հետաքրքիր չէր լինի: Աշխատանքի ընթացքում նրանք ինձ ավելի ու ավելի են գոհացնում՝ որպես մարդ, և ունեն ամենակարևորը, ինչ ինձ պետք է՝ թիմում աշխատելու կարողություն: 

Իմ մասնակիցներն իրար հետ չեն մրցակցում ո՛չ թիմում, ո՛չ դրանից դուրս. նրանք հանդես են գալիս որպես ամբողջական թիմ, մեկը մյուսին ուժ են տալիս, ինչը ես՝ որպես ղեկավար, շատ եմ գնահատում: Կարծում եմ՝ նշված պատճառները բավարար են՝ իմ թիմից գոհ լինելու համար, էլ չեմ խոսում մասնակիցների վոկալային տվյալների մասին»:

Պրոդյուսերը նկատեց, որ կցանկանար աշխատել նաև խմբերի հետ.

«Կարծում եմ՝ աշխատանքը խմբերի հետ հետաքրքիր կստացվեր, քանի որ դրանց մեջ տաղանդավոր երեխաներ կան: Նրանց հետ կարելի է շատ բան փորձել, անսպասելի արդյունք ստանալ»: 

Հարցին, թե նախագծում ով է իր համակրելի մասնակիցը, պրոդյուսերը պատասխանեց. 

«Դե, բնականաբար, իմ երեք մասնակիցներին եմ շատ համակրում, Տյոմի տեսակն եմ շատ հավանում:

Մրցակից թիմերից համակրում եմ Գարիկի՝ Էմմանուել և Մարիամ դուետին, շատ հետաքրքիր զույգ է»:

Նախագծում կարծես ձևավորված ավանդույթ կա, որ հաղթողի կոչումը արական սեռի ներկայացուցչի է բաժին հասնում: Շուշանիկ Արևշատյանը, կարծես, կողմ է, որ օրինաչափությունը այս եթերաշրջանում նույնպես չխախտվի.

«Համոզված եմ, որ այս եթերաշրջանի հաղթողն իմ տղաներից մեկը կլինի, բայց, կարծում եմ, որ Իննան էլ է շատ ուժեղ մասնակից: Չգիտեմ՝ մինչև եզրափակիչ կհասնի, թե ոչ, բայց իր մոտ ինչ-որ բան հաստատ կստացվի»:

 

Մարիամ Նալբանդյան