Ամենայն Հայոց կաթողիկոս Գարեգին Երկրորդը կատարեց իր երրորդ Մյուռոնօրհնությունը

Յուրաքանչյուր Հայրապետի համար երջանկություն է Մյուռոնօրհնություն կատերելը: Ամենայն Հայոց կաթողիկոս Գարեգին Երկրորդն այս տարի կատարեց իր երրորդ Մյուռոնօրհնությունը: Այս մասին լրագրողների հետ զրույցում հայտնեց Տեր Զաքարիա վարդապետ Բաղումյանը: «Առաջին Մյուռոնօրհնությունը Վեհափառը կատարեց 2001 թվականին, երբ մենք ազգովի տոնախմբում էինք Քրիստոնության ընդունման 1700-ամյակը: Եվ բնականաբար, Գարեգին Երկրորդն այն շրջանիկներից է, որ հասել է երրորդին, ու հույս ունենք, որ դեռ երկար տարիներ կկարողանա Մյուռոնօրհնել, որպեսզի մեր երկիրը ավելի խաղաղ, մեր ժողովուրդն էլ ավելի ամուր լինի»,-ասաց  Տեր Զաքարիա վարդապետ Բաղումյանը:

Նրա խոսքով` Մյուռոնօրհնությունը Հայ եկեղեցու ամենակարևոր իրադարձությունենրից մեկն է, երբ Ամենայն Հայոց կաթողիկոսը Հայ եկեղեցու երեք նվիրական սրբություններով` Խաչափայտի մասունքով` Կենաց խաչով, Գեղարդով և Գրիգոր Լուսավորչի աջով օրհնում է Սրբալույս Մյուռոնը: «Ամեն անգամ արարողության ժամանակ հին Մյուռոնը խառնվում է նորին և գրանցվում Սուրբ Գրիգոր Լուսավորչի աջով: Ըստ ժողովորդական ըմբռնման` հենց այդ պահին Մյուռոնի կաթսան սկսում է եռալ և խորհուրդն այն է, որ ամեն անգամ մենք նոր Մյուռոնի մեջ ենք լցնում Գրիգոր Լուսավորչ ի օրհնած Մյուռոնը: Այն Մյուռոնը, որ Քրիստոս տվել էր Թադեոս առաքյալին, դարեր հետո տեսիլքի միջոցով գտնվեց ու Գրիգոր Լուսավորիչն այն խառնեց իր Մյուռոնին»,-ասաց հոգևորականը` ավելացնելով, որ հնի խառնումը նորին խորհրդանշում է այսօրվա կապը մեր նախնիների առաքելական ժամանակների հետ:

Հայ Առաքելական եկեղեցին Մյուռոնօրհնեքի արարողությունը կատարում է 7 տարին մեկ անգամ: Այդ նպատակով աշխարհի տարբեր ծայրերից Մայր Աթոռում են հավաքվում ուխտավորները, կրոնական բարձրաստիճան պաշտոնյաներ: Սրբալույս Մյուռոնի հիմնական բաղադրիչը ձիթենու անարատ ձեթն է, որին խառնվում է բալասան, ինչպես նաև քառասուն տեսակի տարբեր հոտավետ խունկերի, ծաղիկների, անուշահոտ բույսերի արմատների, ծաղկաջրերի, յուղային հյութերի և տերևների միաշաղախված հեղուկը։ 0րհնությունից քառասուն օր առաջ ձիթենու մաքուր յուղով լի կաթսան դրվում է Մայր Տաճարի բեմում և ծածկվում նրբահյուս շղարշով։ Քառասուն օր շարունակ երեկոյան ժամերգությունից հետո հոգևոր պաշտոն է կատարվում՝ շարականներով, աղոթքներով և սուրբգրային ընթերցվածներով։ Մյուռոնօրհնեքի նախատոնակին՝ գիշերը, հսկում է կատարվում, իսկ հաջորդ օրը լինում է օրհնության հանդիսավոր շնորհաբաշխությունը։

Սուրբ մյուռոնով են կատարվում և սրբագործվում եկեղեցական ծիսակարգը` Ջրօրհնեքը, Մկրտությունը, քահանաների,եպիսկոպոսների և կաթողիկոսի օծման արարողությունները և այլն: