«Մեր զինծառայողների դիերը հայկական կողմի ձեռքում չեն, այդ տարածքները մեր հսկողության տակ են». Ադրբեջանի ՊՆ. «Փաստ»

«Փաստ» օրաթերթը գրում է.

Փետրվարի 24–ի լույս 25–ի գործողություններից երկու օր հետո միայն ադրբեջանական կողմը հաստատեց, որ զոհեր ունի: Ուշագրավ է, որ այդ երկրի պաշտպանության նախարարությունը այդ մասին պաշտոնապես հայտարարեց այն բանից հետո միայն, երբ Թուրքիայի ԱԳՆ–ն ցավակցական ուղերձ հղեց իր բարեկամ ժողովրդին և զորակցություն հայտնեց զոհվածների ընտանիքներին: Այս առթիվ նույնիսկ ադրբեջանական մամուլը վրդովմունք հայտնեց, թե ինչու զոհերի մասին պետք է իմանան թուրքական կողմից և ոչ թե սեփական ռազմական գերատեսչությունից:

Այն, որ ադրբեջանական կողմն ունի առնվազն հինգ զոհ, հայտնել էր հայկական կողմը` հրապարակելով հակառակորդի գործողությունների տեսագրությունը, որտեղ երևում էր, որ չեզոք գոտում կա 5 դիակ: Զոհերի մասին խոսել էր նաև ԵԱՀԿ Մինսկի խումբը` կոչ անելով ապահովել դիակների տարհանումը:

Այս ամենից հետո Բաքուն ստիպված եղավ ընդունել փաստը: Միայն թե իրենց սոցցանցերում շրջանառվում էր ոչ թե 5, այլ մինչև 20 զոհվածի անուն: Սակայն քանի որ հայկական կողմի հրապարակած տեսանյութում երևում է միայն 5 զինվորի դի, ամենայն հավանականությամբ, բավարարվել են միայն այդ թվով:

Հայկական կողմը, ինչպես մյուս անգամները, պատրաստակամություն էր հայտնել` որպես բարի կամքի դրսևորում, թույլ տալ զոհվածների դիերի տարհանումը: Ու թեև երեկ ժամը 12–ի դրությամբ պետք է այդ գործողությունն իրականացվեր, սակայն այն մի քանի ժամով ձգձգվեց: Ադրբեջանը, բնականաբար, շտապեց հայտարարել, որ հայկական կողմը տվել էր նախնական համաձայնություն, բայց վերջին պահին նոր պայմաններ էր առաջ քաշել: Այնինչ ինչպես նշել էր Արցախի նախագահի մամուլի խոսնակ Դավիթ Բաբայանը, ադրբեջանական կողմը խախտել էր նախնական պայմանավորվածությունը:

«Ընդհանրապես այդ դիակները դուրս բերելու հստակ կարգ կա: Պարզապես Ադրբեջանը խախտել է այդ կարգը: Ես չեմ ուզում մանրամասների մեջ մտնել, սա փակ տեղեկություն է: Բայց խախտողները իրենք են եղել: Մենք երբևիցե որևէ խոչընդոտ արհեստականորեն չենք ստեղծել: Իրենք իրենց պայմանավորվածությունը խախտել են, ինչպես միշտ անում են»,– ասել էր նա:
Ամեն դեպքում հայկական կողմը հետ չի կանգնել իր դիրքորոշումից, և ադրբեջանցի զինվորների դիերը վերադարձվել են:

Հետաքրքիր է այն հանգամանքը, որ թերևս առաջին անգամ Ադրբեջանի ՊՆ–ն հաստատում է զոհերի առկայությունը, ընդ որում, տալիս է նաև անուններ: Ըստ ամենայնի, պատճառն այն է, որ այդ զինվորները վնասազերծվել էին չեզոք գոտում: Այսինքն՝ թաքցնելն անհնարին էր: Միայն թե այս անգամ էլ իրենք իրենց չեն դավաճանել: Այդ երկրի ՊՆ–ն հայտարարել է. «Մեր զինծառայողների դիերը հայկական կողմի ձեռքերում չեն, որ նրանք էլ վերադարձնեն: Այդ տարածքները մեր հսկողության տակ են: Այնտեղ միջազգային միջնորդների ներկայությունը քայլ է` ուղղված նրան, որ ավելի շատ արյուն չթափվի»:

Մեկ այլ շատ կարևոր հանգամանք: Չեզոք գոտում զինվորներ, այն էլ հատուկ նշանակության ստորաբաժանման մարտիկներ կորցնելը Ադրբեջանի համար մեծ հարված էր: Միայն թե` ոչ մարդկային զոհերի առումով: Անցած տարվա ապրիլից հետո համացանցում հայտնված տեսագրություններում ակնհայտ երևում էր, թե ինչպես են ադրբեջանցի զինվորները հանգիստ հատում չեզոք գոտին ու մոտենում հայկական դիրքերին` առանց որևէ խոչընդոտի հանդիպելու: Երևի, այս անգամ էլ նրանք նույն հույսն էին ունեցել: Բայց ապրիլից հետո շատ բան է փոխվել: Մեր առաջնագիծը հագեցվել է համապատասխան սարքավորումներով և տեխնիկայով: Եվ մենք կարողացել ենք մեծ հեռավորության վրա արձանագրել և կանխարգելիչ հարված հասցնել:
Միայն թե հարց է առաջանում` ինչո՞ւ մինչև անցած տարվա ապրիլը այդ հնարավորությունը մենք չունեինք:

 

Շարունակությունը` «Փաստ» օրաթերթի այսօրվա համարում: