Գոռ Հակոբյանի ու կնոջ ամուսնության 6–ամյակը, սիրո խոստովանությունը և երջանկության բանաձևը

Tert.am Life–ը գրում է

«Ֆուլ հաուս»–ի դերասան Գոռ Հակոբյանը և իր կինը` Հրանուշ Մնոյանը,  արդեն 12 տարի է՝ միասին են, 6 տարի` ամուսնացած։ Օրերս զույգը նշել է ամուսնության 6 ամյակը, թեև այս առիթը հատուկ չեն նշել։ Tert.am Life–ը Գոռ Հակոբյանի հետ զրուցել է ամուսնական  կյանքի մասին։

 Ծանոթացել ենք Գյումրիի միջնակարգ դպրոցներից մեկում

 2004 թվականն էր, երբ Հրանուշը Ռուսաստանից վերադարձավ Հայաստան։ Նրան տեսել եմ դպրոցում և սիրահարվել։ Այդ ժամանակ նա 16 տարեկան էր, ես`17։ 

7 տարի ընկերություն արեցինք, հետո կատարեցինք մեր կյանքի կարևոր քայլերը` նշանվեցինք ու ամուսնացանք։

 Սիրո խոստովանությունն արել եմ Գյումրու դրամատիկական թատրոնում, որտեղ համերգի էի

 2005 թվականի ապրիլի 1–ն էր։ Նրան տարա թատրոնի գրիմանոց և հենց այնտեղ ասացի, որ սիրում եմ իրեն ու միայն իրեն եմ տեսնում իմ կողքին։ Այդ պահն այնքան ռոմանտիկ էր։ Մոռացել էինք, որ այդ օրը խաբելու օրն է։ Այդ ժամանակվանից սկսած միասին ենք մինչև օրս։ Բայց նշանվելու կամ ամուսնության հատուկ առաջարկ չեմ արել։ Մենք իրար հետ ենք մեծացել։ Միշտ միասին էինք որոշումներ կայացնում։ Բացառություն չէին մեր նշանվելն ու ամուսնությունը։ Ամեն ինչ միասին ենք մտածել, կազմակերպել։

 Չստացվեց տոնել մեր օրը

 Ամեն տարի փետրվարի 26–ին նշում ենք մեր ամուսնության օրը։ Այս տարի չստացվեց, քանի որ  նկարահանումների էի։ Ամեն դեպքում հասցրել եմ ուշ երեկոյան ծաղիկներով գնալ տուն գնալ։ Կարծում եմ՝ մոտ օրերս անպայման կտոնենք անուսնության 6–ամյակը։

 Ինչպես բոլոր զույգերի մոտ, մեզ մոտ էլ եղել են վեճեր

 Մեր պլյուսն այն է, որ մենք միասին ենք մեծացել։ Ինքը սովորել է իմ վատ բնավորությանը, ես էլ` իր։ Իրար լավ ենք հասկացել։ Հիմա էլ են լինում վեճեր` արդեն ընտանեկան։ Երբ երեխայի վրա ջղայնանում է, փորձում եմ սաստել, և հակառակը՝ ինքն է սաստում, երբ ես եմ ջղայնանում։

 Զավեշտալի դեպքեր շատ ենք ունեցել

 Հիշում եմ, երբ Դուբայում խանութներով պտտվում էինք, ինքը որոշեց, որ անկողնային պարագաներ պետք է գնի։ Վաճառողը մեզ հարցրեց` ինչ լեզվով եք խոսում, չգիտեմ ինչու ասացի անգլերեն։ Ամենազավեշտալի պահն այն էր, որ Հրուշն ամբողջ խանութը քանդել էր տալիս, որ իր ուզածը գտնի։ Ես էլ մի կերպ թարգմանում էի։ Ամբողջը հերթով նայում էր վերջում ասաց, հարցրու՝ սա քորքոտվում է, թե չէ։ Նայեցի, ասում եմ՝ մի կերպ եմ թարգմանում, հիմա որտեղից գտնեմ այդ բառի անգլերեն տարբերակը։) Այդ դեպքը շատ է տպավորվել։

 Հրուշն իմ կյանքի անբաժանելի մասնիկն է

 Նա շատ ուրախ, դրական, լավ ընկեր է։ Միշտ օգնում է ինձ իր խորհուրդներով։ Երբ ինչ–որ բան եմ ձեռնարկում, միշտ հաշվի եմ առնում իր կարծիքը։ Բայց լինում են դեպքեր, որ հաշվի չեմ առնում։ Առանց իրեն չեմ կարող պատկերացնել ինձ։ Մեզ մոտ մի սահման կա, եթե 10 օր իրար չենք տեսնում, երկուսիս մոտ էլ պանիկա է սկսվում։ Մենք սովոր չենք ապրել առանց իրար։ Դա է պատճառը, որ երբ երկար ժամանակով ինչ–որ տեղ եմ մեկնում, նա և երեխաներս ինձ հետ են լինում։

 Հրուշն ինձ փոխել է, ես իրեն՝ ոչ

 Նա ինձ դարձրել է տունն ավելի սիրող, ընտանիքը սիրող, երեխաներին սիրող մարդ։ Ես իրեն չեմ փոխել։

 Ինձ համարում եմ երջանիկ մարդ, ամուսին, հայր

 Իմ երջանկության բանաձևն այն է, որ ունեմ լիարժեք ընտանիք։ Փառք Աստծո, բոլորն առողջ են, մեկը մյուսին սիրում են։ Կոնֆլիկտներ չկան, եթե փոքր վեճեր էլ լինում են, ապա կենցաղային։

 Պլանավորում ենք աղջիկ էլ ունենալ

 Երկուսս էլ դեմ չենք թեկուզ 10 տղա ունենալ, բայց ուզում ենք, անպայման, աղջիկ էլ ունենալ։