Միասնական գրասենյակները կտրամադրեն նաև փախստականի կարգավիճակ ունենալու վերաբերյալ տեղեկանքներ

 Պետական ծառայությունների մատուցման միասնական գրասենյակներն այսուհետ կտրամադրեն նաև Միգրացիոն պետական ծառայության կողմից մատուցվող՝ փախստականի կարգավիճակ ունենալու և Ադրբեջանից բռնագաղթած փախստական հանդիսանալու վերաբերյալ տեղեկանքներ: ՀՀ կառավարության այսօրվա նիստին, ներկայացնելով ՀՀ կառավարության 2016 թվականի հոկտեմբերի 27-ի N 1109-Ն որոշման մեջ լրացում կատարելու մասին նախագիծը, այս մասին հայտարարեÖ արդարադատության նախարար Արփինե Հովհաննիսյանը: Նախարարի խոսքով՝ առ այսօր այդ երկու տեղեկանքները տրամադրում էր միայն Երևանում գործող Միգրացիայի պետական ծառայությունը: «Երեք ամիս առաջ մեկնարկած այս ծրագրի արդյունքում  ՀՀ ողջ տարածքում այսօրվա դրությամբ գործում է 39 միասնական գրասենյակ»,- նշեց նախարարը՝ հավելելով, որ դրանցից 14-ը գործում է Երևանում, մյուսները՝ Գառնիում, Գյումրիում, Վաղարշապատում, Հաղարծինում, Իջևանում, Բյուրականում, Կարբիում, Արմաշում, Մեծամորում, Զվարթնոցում, Սարուխանում, Ծովագյուղում, Մաստարայում, Վանաձորում , Նոյեմբերյանում, Գավառում, Բերդում, Ալավերդիում, Ստեփանավանում, Եղեգնաձորում, Վայքում, Գորիսում, Կապանում և Մեղրիում:

Ինչպես «Արմենպրես»-ին տեղեկացրին ՀՀ արդարադատության նախարարության տեղեկատվության և հասարակայնության հետ կապերի վարչությունից, Արփինե Հովհաննիսյանի խոսքով՝ այս 39 գրասենյակները մատուցում են 67 պետական ծառայություններ: «Իսկ, ընդհանուր առմամբ, Հայաստանում տարբեր պետական մարմինների կողմից մատուցվող ծառայությունների թիվը գերազանցում է 200-ը: 100-ից ավելի ծառայություններ պահանջում են կամ անձի պարտադիր  ներկայություն կամ օբյեկտի առկայություն, օրինակ ՝ ավտոմեքենայի և այլն, մնացած շուրջ 110 ծառայությունները պարաստ ենք մատուցել միասնական գրասենյակների միջոցով»,- ասաց նախարարը և կոչ արեց քաղաքացիներին օգտվել իրենց տարածքում գործող մասնավոր օպերատորների միասնական գրասենյակներից՝ խնայելով թե՛ ժամանակ, թե՛ ֆինանսական ռեսուրսներ: