Ադրբեջանում էթնիկ պատկանելության մասին խոսելը դիտարկվում է որպես հանցանք

Վերջին շրջանում Հարավային Կովկասում, ինչպես նաև տարածաշրջանում նկատվում է ատելության, բռնության քարոզչության աճ: Երևանում կազմակերպված «Այլատյացությունը և դրա հետևանքները մարդու իրավունքների տեսանկյունից» քննարկման ժամանակ նման կարծիք հայտնեց ՀՀ մարդու իրավունքների պաշտպան Արման Թաթոյանը:

«Մենք` ինքներս, այդ դժբախտություններին ականատես եղանք ապրիլյան պատերազմի ընթացքում: Եղան գործողություններ, որոնք դրսևորվեցին դաժանություններով, խոշտանգումներով: Այսօրվա քննարկման նպատակն է հասկանալ ազգային պատկանելության պատճառով խտրականության դրսևորումների էությունը, նաև դիտարկել, թե ինչ պատկեր ունենք տարածաշրջանում ազգային փոքրամասնությունների իրավունքների պաշտպանության տեսանկյունից»,- ասաց Արման Թաթոյանը:

Արցախի Հանրապետության մարդու իրավունքների պաշտպան Ռուբեն Մելիքյանը նշեց, որ ընտրված թեման արդիական է ոչ միայն Հայաստանի, նաև Արցախի Հանրապետության համար:

«Մեր գործունեության  ընթացքում  մենք ուշադրություն ենք դարձնում այս ուղղությանը: Ապրիլյան պատերազմից հետո Արցախի մարդու իրավունքների պաշտպանն իր զեկույցում անդրադարձ կատարեց այլատյացությանը վերաբերող հարցերին՝ որպես ապրիլյան պատերազմի բուն նախահիմք»,- ասաց նա:

Ռ. Մելիքյանի խոսքով, իրենք շարունակում են հետևել Ադրբեջանի բաց աղբյուրներին՝ հասկանալու համար, թե ինչ վիճակ է տիրում այդ երկրում այլատյացության տեսանկյունից:

 «Որքան էլ լավատես լինենք, դրական  տեղաշարժ, ամեն դեպքում, չենք կարող արձանագրել: Այս ընթացքում տեսանք դեպքեր, երբ դասընթացի ժամանակ երեխաներին ներկայացվում է այնպես, որ հայերը իրենց թշնամիներն են: Տեսնում ենք իրավիճակ, երբ հայի ազգանուն կրող անձը գնում է Ադրբեջան և 10 ժամ պահվում է, և դա այն դեպքում, երբ այդ անձը 10 տարեկան երեխա է»,-ասաց նա: Նա նշեց, որ հավանական է առաջիկայում այս ուղղությամբ առանձին զեկույց լինի, փաստահավաք գործունեությունը շարունակվում է:

ԵՊՀ  Արևելագիտության ֆակուլտետի Իրանագիտության ամբիոնի վարիչ Վարդան Ոսկանյանը նշեց, որ Ադրբեջանում  ձուլման քաղաքականությունից չի կարողացել խուսափել մահմեդական որևէ տեղաբնիկ ժողովրդի ներկայացուցիչ:

«Ադրբեջանում սեփական էթնիկական պատկանելիության մասին խոսելը, դիտարկվում է որպես հանցանք: Մենք տեսնում ենք, որ Ադրբեջանում ինչ ճնշումներ են թալիշ ակտիվիստների նկատմամբ: Մենք ունենք դեպք, երբ թերթի խմբագիրը, ով ազգությամբ թալիշ էր, սպանվել է բանտում: Մեկ այլ խմբագիր ձերբակալվել է շինծու պատրվակով: Բոլորովին վերջերս էլ` մի քանի օր առաջ, ունեցանք դեպք, երբ ձերբակալվեց թալիշ ակտիվիստը: Նա ձերբակալվել է, թե քաղաքական, թե էթնիկական պատկանելիության հիմքով»,- նշեց նա: Վարդան Ոսկանյանն ընդգծեց, որ նման դեպքեր կան մյուս տեղաբնակ ժողովուրդնե րի, մասնավորապես, կովկասյան պարսիկների նկատմամբ:

ՀՀ մարդու իրավունքների առաջին պաշտպան Լարիսա Ալավերդյանն էլ ավելացրեց, որ Ադրբեջանը ոչ միայն չի տարբերվում «Իսլամական պետություն»-ից, ավելին, այդպիսի գործելակերպ ունեցել դեռ տարիներ առաջ:

«Տարիներ առաջ` խորհրդային ժամանակաշրջանում, Ադրբեջանը հանդես է եկել նման դաժան գործողություններով, ցուցադրական սպանություններով, պարզապես այն ժամանակ համացանց չի եղել: Ադրբեջանում եղած անպատժելիությունը, դաժանությունը բնութագրում են հետևյալը` ցեղասպանություն, քաղաքակրթությունից դեպի բարբարոսություն»,-ասաց Լարիսա Ալավերդյանը:

Քննարկմանը  ներկա էին Հայաստանում ազգային փոքրամասնությունների ներկայացուցիչներ, վերջերս Հայաստանից քաղաքական ապաստան խնդրած Ադրբեջանից ժամանած թալիշ ընդդիմադիր լրագրող Շահին Միրզոևը: