ՌԴ օդուժը ոչնչացրել է Սիրիայում ԻՊ-ի կազմում կռվող «Ադրբեջանական գումարտակը»

Ռուսաստանի ռազմաօդային ուժերը Սիրիա ժամանելուն պես մի շարք ավիահարվածներ են հասցրել «Իսլամական պետություն» ահաբեկչական խմբավորման կազմում կառավարական ուժերի դեմ Հալեպի նահանգում կռվող մարտիկների դիրքերի վրա: Ռուսաստանյան օդուժին ցամաքից աջակցել է սիրիական բանակը: Գործողությունների ընթացքում ոչնչացվել են 120-140 իսլամիստ ահաբեկիչներ:

Այս մասին հայտնում է Warlifes.ru լրատվական կայքը:

Սիրիայի արաբական բանակի ավագ սպայի խոսքով` ռուսաստանյան օդուժի այդ ավիահարվածները համաձայնեցված էին SAAF-ի հետ, որը հարձակումներ է իրագործում Իրաքից ԻՊ-ին զորավիգ ուժեր եւ սպառազինության մատակարարումներ ապահովող Ռաքքա-Դեյր էս Զոր ավտոմայրուղու երկայնքով: Ավիացիան գրոհել է ռուսաստանյան հետախուզության կողմից հայտնաբերված մարտիկների ճամբարների վրա: Մասնավորապես, հրամանատարի հետ միասին ոչնչացվել են ԻՊ-ի կազմում կռվող «Ադրբեջանական բատալյոնը», Ռաքայում ԻՊ-ի մարտական սնուցման պահեստները եւ շտաբը:

Ալ Կաիդայի Timeturk կայքին տված հարցազրույցում Բաքվից 30-ամյա ադրբեջանցի հրամանատար Մահմուդ Ազերին օրերս հայտարարել էր, որ ներկայում Սիրիայում կառավարական ուժերի դեմ կռվում են հարյուրավոր ադրբեջանցիներ, որոնք ԻՊ-ի մարտիկներ չեն հանդիսանում:  

Պատասխանելով Ադրբեջանի նկատմամբ Ալ Կաիդայի ծրագրերի մասին հարցին, Մահմուդ Ազերին հայտարարել էր իր այն ցանկության մասին, «որպեսզի ադրբեջանցիներն իմանան իրական իսլամի մասին»:

Դրա հետ միասին, ադրբեջանական ԶԼՄ-ների համաձայն` միայն Սիրիայում վերջին երեք տարիների ընթացքում ոչնչացվել են 200-ից ավելի ադրբեջանցի ահաբեկիչներ: Ադրբեջանական ԶԼՄ-ները բազմիցս հայտնել են նաեւ ահաբեկչական խմբավորումների կազմում ադրբեջանցի հրամանատարների ոչնչացման մասին:

Ուշագրավ է, որ վերջին շրջանում ոչ միայն ադրբեջանցիներն իրենք են դառնում ահաբեկչական խմբավորումների անդամներ, այլ նաեւ դրանում ներգրավում են իրենց անչափահաս երեխաներին:

Ադրբեջանական ԶԼՄ-ներն ավելի վաղ հայտնել էին, որ Սիրիայում  ապստամբների կողմից նախագահ Բաշար Ասադի դեմ կռվում են 3000-ավելի Ադրբեջանի քաղաքացիներ, իսկ Սիրիայում եւ Իրաքում ամբողջ պատերազմի ընթացքում ոչնչացվել են 350-ից ավելի ադրբեջանցիներ: 2013 թ-ի մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ հանուն հավատի)  կատարել Սիրիայում: