Նախընտրական միջադեպերը պայմանավորված են ռեյտինգային համակարգով. քննարկում քաղաքական ուժերի միջև

ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, «Օհանյան-Րաֆֆի-Օսկանյան» դաշինքի պատգամավորի թեկնածու Էլինար Վարդանյանը, «Կոնգրես-ՀԺԿ» դաշինքի պատգամավորի թեկնածու Զոյա Թադևոսյանը, «Հայ Յեղափոխական Դաշնակցություն» կուսակցության անդամ, պատգամավորի թեկնածու Բագրատ Եսայանը, «Ծառուկյան» դաշինքի ներկայացուցիչ Վահե Էնֆիաջյանն անդրադարձան նախընտրական շրջանում ընտրություններով պայմանավորված միջադեպերին:

Էլինար Վարդանյանի գնահատմամբ՝ այս ընտրություններին անհանդուրժողականությունը խորացել է, ինչը պայմանավորված է նոր ընդունված Ընտրական օրենսգրքով, և իրենք նախկինում էլ ասում էին, որ այն շատ վտանգավոր եզրույթներ է պարունակում:

«Այս ընտրական օրենսգրքի մեջ վտանգավոր եզրույթը ռեյտինգային ցուցակներն են, և ամենաշատ վատությունը, որը կարելի էր անել հասարակությանը, արվել է այս օրենքի նախագծով»,-ասաց նա և նշեց, որ հայ հասարակությանը բնորոշ է տարանջատումը ՝ երևանցիներ, աբովյանցիներ, և հիմա նույնիսկ թիմերի ներսում է տարանջատումը սկսվել, ինչը ռեյտինգային ցուցակներով է պայմանավորված:

«Ես վստահ եմ, որ կան նախադրյալներ, որ հասարակությունը բաժանվելու է խմբերի, և սկսելու են միմյանց մեջ պայքարը»,-ասաց նա: Ինչ վերաբերում է նախկին արտգործնախարար Վարդան Օսկանյանի որդու հետ կապված միջադեպին և հարուցված քրեական գործին, Էլինար Վարդանյանն ասաց, որ իրականում այլ պարագաներում նման հաղորդման հիման վրա քննչական մարմիններում քրեական գործ չէր հարուցվում, հետևաբար մեկնաբանությունը թողեց հասարակությանը:

ՀԱԿ ներկայացուցիչ Զոյա Թադևոսյանը նշեց, որ համատարած վախի մթնոլորտը չի համապատասխանում ժողովրդավարությանը, և ընդունված Ընտրական օրենսգիրքը եկավ ամրագրելու ավտորիտար ռեժիմի առանձնահատկությունները: 

«Յուրաքանչյուր մեծամասնական թեկնածու ոչ միայն այլ թեկնածուների դեմ է պայքարում, այլ նրանց նպատակն է, որ թիմի ներսում հանդես գա այնպիսի հեղինակություն, որը ավելի մեծ ձայներ կարող է բերել կուսակցությանը»,-ասաց նա:

Ըստ նրա՝ ցանկացած միջադեպ քննարկման առարկա պետք է լինի Կենտրոնական ընտրական հանձնաժողովում, և գրանցումից տվյալ թեկնածուին պետք է հանել:

«Ծառուկյան» դաշինքի ներկայացուցիչ Վահե Էնֆիաջյանն ասաց, որ թեև քարոզարշավը նոր է սկսվել, բայց արդեն միջադեպեր են եղել: Ըստ նրա՝ ուժ գործադրելը, վախի մթնոլորտ քարոզելը ոչ մի լավ բանի չի բերելու, և դրանք անհամադրելի են բարձր արժեքների հետ:

«Օրենքի տառը պետք է գերակայի ամենուրեք: Մեր թիմը կուռ թիմ է, գիտակցում է այս պայքարի արժեքը»,-ասաց նա և նկատեց, որ որոշ թիմերում իրոք անձերի միջև ներքին անհաշտություն, անհամաձայնություն կա և պետք է ամեն ինչ անել, որ անցանկալի դրսևորումներ չստանան:

ՀՅԴ ներկայացուցիչ Բագրատ Եսայանը նշեց, որ որևէ ճնշում, բռնություն անթույլատրելի է, բայց դա նոր երևույթ չէ. Հայաստանում բոլոր ընտրությունների ընթացքում կամ հետո բռնությունների մասին հրապարակումներ եղել են: 

«Դա խոսում է երկրում ժողովրդավարական ավանդույթների բացակայության մասին և այն մարդկանց մտայնության, որ զոռբայությամբ կարելի է հասնել ամեն ինչի՝ նույնիսկ խորհրդարան: Ես չեմ համարում, որ սա նոր երևույթ է և ռեյտինգային համակարգի ներդրման արդյունքում ծնվեց: Ռեյտինգային համակարգը իդեալական չէ, բայց մենք չպետք է թերությունը տարածենք ամբողջ համակարգի վրա»,-ասաց նա:

Ըստ նրա՝ ընտրությունը պետք է լինի գաղափարների, ծրագրերի պայքարի արդյունքում, ոչ թե ուժի կամ քսակի գործադրմամբ, և իրենք միշտ գաղափարական պայքարով են հանդես եկել: