ՀԿԿ-ն Երևանի Հյուսիսային պողոտայում Կանանց միջազգային օրվա առթիվ ակցիա կազմակերպեց

Հայաստանի կոմունիստական կուսակցությունը Կանանց միջազգային օրվա առթիվ Երևանի Հյուսիսային պողոտայում կազմակերպեց միջոցառում: «Արմենպրես»-ի հաղորդմամբ` կուսակցության առաջնորդները իգական սեռի բոլոր ներկայացուցիչներին բաժանեցին վարդեր և շնորհավորեցին կանանց տոնը:

«Այս քայլով մենք մեր հարգանքն ենք ցույց տալիս հայ կանանց` մեր մայրերին, քույրերին, ցանկանալով նրանց առողջություն, երջանիկ կյանք և բարեկեցիկ ապագա, որը, կարծում եմ, կբերի սոցիալիստական համակարգը»,- ասաց Հայաստանի կոմունիստական կուսակցության կենտրոնական կոմիտեի քարտուղար Գագիկ Մանուկյանը: Նա բարձր գնահատեց կուսակցության հնարավորությունները առաջիկա խորհրդարանական ընտրություններում:

«Մեր քարոզարշավը սկսել ենք Տավուշից, այնուհետև այցելել ենք Կոտայքի մարզ: Հանրապետությունում ունենք 36 շտաբ և այդ շտաբները կարողանում են ապահովել քարոզարշավի բնականոն ընթացքը: Այս մի քանի օրվա քարոզարշավը ցույց տվեց, որ ժողովրդի մեջ մեծ է պահանջարկը կոմունիստական գաղափարախոսության նկատմամբ»,- ասաց ՀԿԿ Կենտկոմի քարտուղարը:

Առաջադիմական կուսակցության նախագահ Վազգեն Սաֆարյանը կարևորեց այն, որ իրենց կուսակցության ցուցակում մեծ թվով կանայք են ընդգրկված, որոնք հեղինակություն վայելում հասարակությունում:

«Մեր կուսակցության ցուցակում ընդգրկված են գիտության դոկտորներ, վաստակավոր արտիստներ, գործիչներ, արտադրության ղեկավարներ և այլն: Այդ առումով մենք տարբերվում ենք մյուս քաղաքական ուժերից, քանզի մեր ցուցակի կանայք մեծ ներդրում ունեն թե΄ արդյունաբերության, թե΄ մշակույթի, թե΄ գիտության ոլորտներում: Հուսով եմ, որ կոմունիստական կուսակցությունը կկարողանա անցնել խորհրդարան, և այդ կանայք իրենց գիտելիքները, փորձը և ընդունակությունները կծառայեցնեն ի շահ Հայաստանի Հանրապետության»,- ընդգծեց Սաֆարյանը: