Արամ Սարգսյան. «Կուսակցություններից ոչ մեկը չի հասկանում, որ իր գործողություններով Հանրապետականի ջրաղացին է ջուր լցնում». «Փաստ»

«Փաստ» օրաթերթը գրում է.

«Դեմոկրատական» կուսակցության նախագահ Արամ Գասպարի Սարգսյանը «Փաստի» հետ զրույցում անդրադառնալով Gallup International ընկերության կողմից օրերս ներկայացված նախընտրական հետազոտության արդյունքներին, ասաց, որ իրենք դեռևս անցյալ տարվա հոկտեմբերին էին նմանատիպ հարցում պատվիրել, որի արդյունքները բավականին մոտ էին ներկայացված ցուցանիշներին:

«Այն ժամանակ էլ շատ հստակ էր, որ եթե Գագիկ Ծառուկյանը վերադառնա քաղաքականություն և գլխավորի նախընտրական ցուցակը, ապա իրենց վարկանիշն անպայման շատ ավելի բարձր կլինի: Ինչ վերաբերում է Հանրապետականին, ապա իշխանությունների նկատմամբ անվստահության և անտարբերության տոկոսը 68,3 էր, իսկ իշխանություններին վստահողները կազմել էին հարցվածների 9,6%–ը: Ի դեպ, վերջին ցուցանիշի 4,7%–ը պետական համակարգում աշխատողներն էին եղել»,– ասաց Ա. Սարգսյանը:

Համեմատելով հարցման վերջին արդյունքները իրենց կողմից պատվիրվածի հետ, քաղաքական գործիչը նշեց, որ իրենք նույնպես փորձել էին պարզել վարչապետ Կարեն Կարապետյանի վարկանիշը: Իրենց հարցման արդյունքներով այն 74% է եղել, սակայն ՀՀԿ–ին անդամակցելուց հետո այդ ցուցանիշը որոշակիորեն նվազել էր:

«Դեմկուսի» հոկտեմբերյան հարցումներով ՀՀԿ–ի վարկանիշը 8,6% է եղել, ԲՀԿ–ինը կազմել է մոտ 17%, ՀՅԴ–ի վարկանիշը կազմել է 4,1%, ՀԱԿ–ինը 3,2%, ՀՎԿ–ինը՝ 2,6, ՀԿԿ–ի վարկանիշը 2,4% է եղել, իսկ «Ժառանգություն» կուսակցության համակիրները կազմել են մոտ 9%, որի առյուծի բաժինը Զարուհի Փոստանջյանի հանդեպ ունեցած բարձր վստահության արդյունքն է եղել:

««Դեմոկրատական» կուսակցության վարկանիշն, ըստ այդ հարցման արդյունքների կազմել է 5,5%, սակայն պետք է հաշվի առնել, որ ընտրություններին մասնակցելու համար կուսակցությունը պետք է մոտ 21 հազար դոլարի չափով գումար գրավադրի, իսկ հեռուստատեսային մոտ 10 րոպեանոց հարցազրույցը 2000 դոլար գումար արժե: Այսինքն, այսօր ընտրություններին մասնակցելը դարձել է այնպիսի թանկ հաճույք, որ ոչ բոլոր կուսակցություններն են ի վիճակի նման ֆինանսական արգելքներ հաղթահարել: Դա է պատճառը, որ ստիպված ընտրում են որևէ կուսակցության հովանու տակ, կամ՝ հետ հանդես գալու տարբերակը»,– ասաց Ա. Սարգսյանը:

Ֆինանսական ռեսուրսներ չունենալու պատճառով շատ կուսակցությունների գաղափարները թղթի վրա մնալու մասին «Դեմկուսի» ղեկավարը նշեց, որ դրանից խուսափելու համար էին իրենք որոշել միավորվել Սեյրան Օհանյանի շուրջ ձևավորված «Համախմբում», «Երրորդ իշխանություն» կուսակցությունների դաշինքում: Բայց փաստորեն դա էլ ցույց տվեց, որ այստեղ ևս «փորձանքներ» կան:

«Մենք ստիպված եղանք հրաժարվել այդ դաշինքից, քանի որ խախտվեցին բոլոր հնարավոր սկզբունքները: Մենք որևէ մեկին չէինք լիազորել մեր փոխարեն որոշումներ կայացնել: Եվ եթե դա իմանայինք, ապա ի սկզբանե չէինք համաձայնի այդ դաշինքի մաս կազմել: Բացի այդ, նման դաշինքների ժամանակ ամբիցիաներ են առաջ գալիս, որը կարելի է ասել մանկական հիվանդության է նման, քանի որ մեր երկրում կուսակցություններն իրականում դեռևս կայացած չեն»,– ասաց Ա. Սարգսյանը:

Ռեյտինգային ընտրակարգին առաջինը ընդդիմացած քաղաքական կուսակցությանն այն ժամանակ որևէ կուսակցություն թեև չի պաշտպանել, սակայն այսօր բոլորը խոսում են այն մասին, որ դա խայտառակ մրցապայքար է ենթադրում: Իսկ եթե հնարավոր լիներ ժամանակը ետ տալ ու նորից քաղաքական գործընկեր փնտրել, ապա չի բացառվում, որ Դեմկուսը միայնակ հանդես գար, քանի որ իրենց կարծիքով որևէ քաղաքական ուժ կամ միավորում իրենց գաղափարախոսությանը չի համապատասխանում:

«Ամենագլխավոր հարցն այն է, որ այս համակարգը պետք է կազմաքանդվի, քանի որ այս համակարգի դեպքում որևէ առաջընթաց չի կարող լինել: Եվ եթե դրա փոխարեն փորձում են կոսմետիկ կամ պոպուլիստական փոփոխություններ առաջարկել, դրանից ոչ միայն ոչինչ չի փոխվի, այլ ավելի կվատանա վիճակը: Ի դեպ, կուսակցություններից ոչ մեկը չի հասկանում, որ իր այդպիսի գործողություններով Հանրապետականի ջրաղացին է ջուր լցնում, քանի որ եթե չեն հակադրվում այսօրվա քաղաքական, տնտեսական, սոցիալական կառավարման համակարգին, ուրեմն ուզում են ընդամենը մի փոքր փոխել իրավիճակը, ոչ թե արմատական փոփոխություններ իրականացնել»,– ասաց Ա. Սարգսյանը:

Ու քանի որ ըստ քաղաքական գործչի՝ միակ կուսակցությունը Դեմկուսն է (՞), որը երկրում արմատական փոփոխությունների հարցն է առաջնայինը համարում, ուստի չի բացառվում, որ առաջիկայում հանդես գան ոչ մի կուսակցությանը կամ դաշինքին չսատարելու մասին կոչով:

 Շարունակությունը` «Փաստ» օրաթերթի այսօրվա համարում: