Մյուռոնօրենքի կաթսայով նամականիշը հավակնում է դառնալ համաշխարհային ֆիլատելիայի լավագույն արժեքներից մեկը

ՀԱՍԱՐԱԿՈՒԹՅՈՒՆ 29 Սեպտեմբեր, 2015 16:24

Մայր Աթոռ Սուրբ Էջմիածնում մարվեց ու շրջանառության մեջ դրվեց «Մյուռոնօրհնության» թեմային նվիրված մեկ նամականիշով գեղաթերթիկ: «Վաչե և Թամար Մանուկյան» Մատենադարանում կայացած միջոցառումն անցկացվեց Ամենայն Հայոց կաթոսիկոսի, բարձրագույն հոգևոր դասի, հրավիրյալ քաղաքացիների մասնակցությամբ: Նամականիշի մարման գործընթացի կողմերն էին ՀՀ տրանսպորտի և կապի նախարար տեղակալ Գագիկ Թադևսյանը, «ՀայՓոստ» ընկերության գլխավոր գործադիր տնօրենի պաշտոնակատար Հայկ Ավագյանը և Մայր Աթոռ Սուրբ Էջմիածնի վարչատնտեսական բաժնի տնօրեն Տեր Մուշեղ եպիսկոպոս Բաբայանը:

Գագիկ Թադևոսյանը նշեց, որ իրադարձությունը խորհրդանշական է մի քանի առումով: «Խորհրդանշական է, որ հայ եկեղեցու Մատենադարանի շենքում ենք մարում Մյուռոնի կաթսային նվիրված նամականիշը, ըստ էության` սա էլ կդառնա մատենագիտական արժեք: Խորհրդանշական է, որ նամականիշը մարվում է 2015 թվականին` Հայոց ցեղասպանության 100-րդ տարելիցի տարում»,-ասաց փոխնախարարը: Նրա խոսքով` մեծ պատասխանատվությամբ մոտեցան Մայր Աթոռի առաջարկին ունենալ նշյալ նամականիշը: Գագիկ Թադևոսյանը տեղեկացրեց, որ հաջորդ տարի էլ պատրաստվում են Սրբադասմանը նվիրված նամականիշ թողար կել: Նա հույս հայտնեց, որ Մյուռոնօրենքի կաթսան պատկերող նամականիշը կդառնա համաշխարհային ֆիլատելիայի լավագույն արժեքներից մեկը:

Մայր Աթոռի Վարչատնտեսական բաժնի տնօրեն Տեր Մուշեղ եպիսկոպոս Բաբայանի դիտարկմամբ էլ` Սրբալույս Մյուռոնի կաթսան պատկերող նամականիշը կդառնա Հայ եկեղեցու դեսպանը աշխարհի տարբեր ծագերում: «Աշխարհում այն մարդիկ, ովքեր հաճույք ունեն նամականիշներ հավաքելու, հաճույք ունեն էլեկտրոնային դարում ձեռքով նամակ գրելու և ուղակելու, պետք է Մայր Աթոռ Սուրբ Էջմիածնի դեսպանը դարձնեն այս փոքրիկ նամականիշը»,-նշեց Մուշեղ եպիսկոպոս Բաբայանը: Նա մարված նամականիշի առաջին օրինակը հանձնեց Գարեգին Բ կաթողիկոսին:

Այս նամականիշը միացավ կրոնական թեմաներով այլ նամականիշներին, որոնք մոտ 200-ն են Հայաստանի Հանրապետության անկախությունից ի վեր: Սրբալույս Մյուռոնի կաթսան պատկերող նամականիշի չափերն են 30/40 մմ, գեղաթերթիկինը` 90/70 մմ, դիզայնը Գևորգ Պողոսյանի, տպարանը` Ֆրանսիա, Cartor, տպաքանակը` 20 հազար: