Գուրգեն Դաբաղյան. «Իմ կյանքում շատ բան է փոխվել»

Tert.am Life-ը գրում է.

Ժողովրդական երգիչ Գուրգեն Դաբաղյանն այսօր նշում է 29–ամյակը։ Երգիչը կեսգիշերից բազում շնորհավորական նամակներ և մաղթանքներ է ստացել և շարունակում է ստանալ։ Tert.am Life–ի հետ զրույցում նա նշեց, որ օրը սկսել է աշխատանքային մթնոլորտում։

«Պատրաստվում եմ նոր տեսահոլովակի նկարահանումներին։ Երկու օր է մնացել, պետք է ամեն ինչ հասցնեմ վերջացնել։ Հագուստների ընտրությամբ, պարային փորձով. ահա այսպես է սկսվել օրս, իսկ թե ինչպես կավարտվի, դեռ պարզ չէ։ Եթե ժամանակ գտնեմ, անպայման, կնշեմ տարեդարձս։ Հիմա գործերս այնքան կարևոր են, որ չեմ կարող հետաձգել»,– ասաց Գուրգենը։

Վերջինս խոսեց իր անցած ճանապարհի մասին. «Այս տարիների ընթացքում իմ կյանքում շատ բան է փոխվել։ Ամեն պահ նոր ձևով ես քեզ բացահայտում։ Այս տարիներն ինձ ամեն ինչ տվել են, սովորեցրել։ Իհարկե, դժվարություններ էլ են եղել։ Բոլոր արտիստներն էլ ունեն ինչ–որ դժվարություններ, որոնք տեսանելի չեն հանրության կողմից։ Արտիստի կյանքն այնպիսին չէ, ինչպես երևում է հեռուստաէկրաններին։ Թե ինչ անձնական, ստեղծագործական խնդիրներ, հաջողություններ ու անհաջողություններ ունի արտիստը, մարդիկ չեն տեսնում։ Պետք էլ չէ, որ տեսնեն։ Իհարկե, հարցը ոչ միայն իմ մասին է, ընդհանուր առմամբ եմ ասում։ Այդ ամենը փորձում ենք մեր ուժերին չափով հաղթահարել»,– նշեց նա։

Խոսելով իր դժվարությունների մասին` Գուրգենը նշեց, դեռ փոքրուց ունեցել է բարդություններ։ «Փոքր տարիքից միշտ էլ եղել են դժվարություններ՝ կապված երգեցողության և երաժշտական ժանրի հետ։ Փոքր տարիքում մոդա չէր ժողովրդական երգելը, ինչպես հիմա։ Այն ժամանակ 8–10 տարեկան էի ու երգում էի բարդ երգեր` Սայաթ–Նովա, Ջիվանի։ Շատ դժվար էր հեռուստաէկրաններով հեռարձակել այդ երգերը։ Ճանապարհ չկար բացված։ Առաջինը ես էի, իմ հետևից նոր եկան ժողովրդական երգիչները։ Ինտերնետային դաշտը զարգացած չէր։ Կազմակերպչական հարցերն էլ էին թերի։ Փոքր տարիքում շատ բան չեմ զգացել։ Երգում էի ու իմ մանկությունը վայելում։ Հիմնականում դժվարությունների միջով անցել են իմ պապան ու հոպարս»,– ասաց Գուրգենը։

Երգիչը նշեց, որ չի փոխի ժողովրդական երաժշտությունը։ «Հնարավոր է՝ որոշ էքսպերիմենտներ անեմ, բայց ժողովրդականն իմ արյան մեջ է։ Իմ կյանքն ու աշխարհն է։ Դա որպես պարտականություն չեմ անում»,– հավելեց Գուրգենը։

Հարցին` ուշադրություն դարձնո՞ւմ է, որ իր երգացանկում լինեն կոմերցիոն երգեր, նա պատասխանեց. «Այնպես չէ, որ կոմերցիան և որակը  հակասում են իրար։ Կարող են լինել որակով կոմերցիոն երգեր, անճաշակ՝ ոչ կոմերցիոն։ Եթե կոմերցիոն գործ ենք անում, չի նշանակում, որ լավը չէ։ Իհարկե, ուշադրություն դարձնում եմ կոմերցիոն երգերին, քանի որ իմ ընտանիքը բիզնես չունի, և ես իմ երգով եմ գումար աշխատում, ապրում։ Սուտ կլինի, եթե ասեմ՝ կոմերցիոն գործերն ինձ չի հետաքրքրում»,– նշեց երգիչը։

Զրույցը եզրափակելով՝ Գուրգենն ինքն իրեն մաղթեց նոր հաջողություններ, երգեր, գումար, սեր ու երջանկություն։ Իսկ անձնական կյանքում նա դեռ նորություններ չունի։

Նյութը` Մելինե Տոնոյանի