Հայաստանը 2016 թվականին կհյուրընկալի «Երեխաների սնուցման գլոբալ ֆորում»-ը

ՀՀ կրթության և գիտության  նախարար Արմեն Աշոտյանը սեպտեմբերի 29-ին ընդունել է Պարենի համաշխարհային ծրագրի հայաստանյան գրասենյակի ղեկավար Պասկալ Միշոյին: Ինչպես  տեղեկացրին ՀՀ կրթության և գիտության նախարարության հասարակայնության հետ կապերի և տեղեկատվության վարչությունից, հանդիպման ընթացքում քննարկվել են «Կայուն դպրոցական սնունդ ծրագրի» ընթացքի, մարտահրավերների և զարգացման հարցեր: Արմեն Աշոտյանն ընդգծել է արդյունավետ համագործակցությունը ՄԱԿ-ի Պարենի համաշխարհային ծրագրի հետ` կարևորելով վերջինիս կողմից իրականացվող դպրոցական սնունդ ծրագիրը: Նախարարը կարևորել է ծրագրի իրականացումը ՀՀ հանրակրթական դպրոցներում` հույս հայտնելով, որ վերջնարդյունքում ծրագիրը կծածկի հանրապետության ողջ տարածքը: Այդ համատեքստում Արմեն Աշոտյանը հատկապես կարևորել է համապատասխան ենթակառուցվածքների ստեղծումը: 

Պասկալ Միշոն իր հերթին նշել է, որ համատեղ ջանքերով մշակված դպրոցական սնունդ ծրագրի տեսլականի և գործողությունների արդյունքում մեկ տարով երկարաձգվել է ծրագրի իրականացումը, մինչև ՀՀ կառավարությունը կստանձնի ծրագրի շարունակականության ապահովումը: 

Հանդիպման ավարտին նշվել է նաև, որ Հայաստանը պատրաստակամություն է հայտնել 2016 թվականին հյուրընկալել «Երեխաների սնուցման գլոբալ ֆորումը»:

ՀՀ կառավարության ֆինանսավորմամբ 2014 թվականի սեպտեմբերի 1-ից «Կայուն դպրոցական ծրագիրը» մեկնարկել է Վայոց ձորի մարզից: Ներկայումս մարզի բոլոր 45 դպրոցների տարրական դասարանների 2386 աշակերտներ ստանում են դպրոցական նախաճաշ: 2015 թվականից ծրագիրն իրականացվում է նաև ՀՀ Արարատի և Սյունիքի մարզերում: Ներկայումս Արարատի մարզի 107 դպրոցներից 77-ում տրվում է տաք սնունդ: Ծրագրում ընդգրկված մարզի աշակերտների ընդհանուր թիվը 13618 է, տաք սնունդ ստացողներինը` 8629: Սյունիքի մարզի 113 դպրոցներից 41-ում ծրագրում ընդգրկված աշակերտների ընդհա նուր թիվը 6300 է, տաք սնունդ ստացողներինը` 3200: Ծրագրի աջակցությամբ վերոնշյալ 3 մարզերի բոլոր դպրոցները համալրվել են անհրաժեշտ սարքավորումներով: