Նարեկ Հախնազարյանը ելույթ կունենա Լոնդոնում

Հանրահայտ թավջութակահար, Չայկովսկու անվան XIV միջազգային մրցույթի դափնեկիր Նարեկ Հախնազարյանը մարտի  11-ին ելույթ կունենա Լոնդոնի King's Place-ում:

«Արմենպրես»-ի հաղորդմամբ`  այդ մասին գրված է Համերգասրահի պաշտոնական կայքում: Հախնազարյանը ելույթ  կունենա դաշնակահարուհի Օքսանա Շևչենկոյի հետ՝ ներկայացնելով Չայկովսկու, Ռախմանինովի, Խուդոյանի, Խաչատրյանի, Հարությունյանի և Սոլլիմայի ստեղծագործությունները:

Նարեկ Հախնազարյանը ծնվել է 1988 թվականին Երևանում։ Երաժշտական կրթությունը ստացել է պրոֆեսոր Զարեհ Սարգսյանի թավջութակի դասարանում։ 2000 թվականին ուսումը շարունակել է Մոսկվայում` պրոֆեսոր Ալեքսեյ Սելեզնյովի դասարանում: ԱՄՆ-ի Փասադենա քաղաքի սիմֆոնիկ նվագախմբի մենակատարն է։ Շրջագայություններով հանդես է եկել աշխարհի տարբեր պետություններում` ԱՄՆ, Գերմանիա, Մեծ Բրիտանիա, Ֆրանսիա և այլուր։

Մասնակցել է բազմաթիվ միջազգային մրցույթների և ամենուր արժանացել բարձր գնահատանքի, պատվոգրերի, մրցանակների, այդ թվում՝ 2008թ. Նյու Յորքի «Young Concert Artists» մրցույթում արժանացել է 9 Հատուկ մրցանակի, 2006թ. Արամ Խաչատրյանի անվան միջազգային մրցույթում` 1-ին մրցանակ և ոսկե մեդալ, 2007թ. Չայկովսկու անվան մրցույթում` դափնեկրի կոչմանը: 2007թ. արժանացել է ՀՀ նախագահի երիտասարդական մրցանակին: «Վաշինգթոն փոսթ» թերթը նրան անվանել է «ֆենոմենալ թավջութակահար»: 2011թ. դարձել է Չայկովսկու անվան մրցույթի ոսկե մեդալակիր: 2013թ. արժանացել է ՀՀ «Մովես Խորենացի» պետական մեդալի: