Մարդը միշտ սիրո կարիք ունի, ու բնավ կարևոր չէ՝ սիրահարվել ես քեզնից շատ մեծի, թե փոքրի. Նարինե Պետրոսյան

Ինչպես հայտնի է՝ օրերս Երեւանի Հրաչյա Ղափլանյանի անվան դրամատիկական թատրոնում կայացավ «Սերը տարիք չի հարցնում» ֆրանսիական իրավիճակային կատակերգության  պրեմիերան: 2 գործողությամբ այս ներկայացման դերասանական կազմում են Մարիամ Ադամյանը, Գոհար Իգիթյանը, Արտաշես Մխիթարյանը, Նարինե Պետրոսյանը եւ Հրաչյա Հարությունյանը, ով եւ բեմադրել է  ներկայացումը:

Life.panorama.am-ը «Սերը տարիք չի հարցնում» կատագերկության, դերասանական կազմի եւ հանդիսատեսի արձագանքի մասին խոսել է դերասանուհի Նարինե Պետրոսյանի հետ:

 

««Սերը տարիք չի հարցնում» ներկայացման անվանումն արդեն պատմում է, թե ինչի շուրջ է պատմությունը ծավալվում: Կարծում եմ՝ ցրտաշունչ ձմռանից հետո սա շատ տեղին ներկայացում է, քանի որ մարդն իր տեսակով երեկարշունչ ձմռանից հետո նոր ապրումների, հույզերի ու կրքերի կարիք է ունենում: Ներկայացումը հենց այս մասին է, որ յուրաքանչյուր մարդ, անկախ իր տարիքից, ցանկություն ունի նոր էմոցիաներ ապրել, քանի որ դա մարդուն ուժ ու կյանք է տալիս: Ըստ իս՝ ներկայացումը դիտելիս ոչ թե պետք է կենտրոնանալ տարիքային տարբերության, այլ սիրո առկայության փաստի վրա, որովհետեւ մարդը միշտ սիրո կարիք ունի, ու բնավ կարեւոր չէ՝ սիրահարվել ես քեզնից շատ մեծի, թե փոքրի: Գլխավորը կյանքում սիրո առկայությունն է, այդ ժամանակ մնացյալ ամեն բան երկրորդական է դառնում»,- պատմեց Նարինեն: Նա մարմնավորում է Ջուլիային, ով գլխավոր դերակատարի՝ Էդուարդ Կոլումբիի դուստրն է ու սիրահարված է իրենից տարիքով մեծ բանաստեղծի:

 

Ըստ Ֆրանսիացի դրամատուրգ ժան Կլոդ Իսլերի պիեսի սյուժեի՝ 20-ամյա ուսանողուհի Սառան սիրահարված է իր դասախոսին՝ Էդուարդ Կոլումբին։ Միաժամանակ, 52-ամյա պրոֆեսորին հանգիստ չի տալիս նախկին կինն ու պարբերաբար ներխուժում է նրա կյանք։ Կինն էլ իր հերթին փորձում է նոր կյանք սկսել իրենից երիտասարդ տղայի հետ։ 

 

Խոսելով փորձաշրջանից՝ Նարինեն պատմեց.

 

«Նախ պետք է ասեմ, որ ինձ համար միշտ մեծ պատիվ ու նաեւ պատասխանատվություն է աշխատել Հրաչյա Հարությունյանի հետ, քանի որ նրա նման արտիստի եւ մարդ տեսակի մեր իրականության մեջ հազվադեպ կարելի է հանդիպել: Մեծ հաճույք է նրա նման մարդու հետ շփվելն ու նրանից ինչ-որ բան սովորելը: Այնպես, որ փորձաշրջանը շատ հետաքրքիր ու բուռն է անցել, անգամ եղել են իրավիճակներ, երբ ես որոշ մտավախություններ եմ ունեցել, բայց, վստահելով Հրաչյա Հարությունյանի խոսքին, չեմ սխալվել: Փորձաշրջանի մասին խոսելիս՝ կհիշեմ նաեւ Մարիամ Ադամյանի հետ աշխատանքը, ում հետ առաջին անգամ էինք աշխատում: Քանի որ երկուսս էլ մարմնավորում էինք 19-20 տարեկան աղջիկների, ետնաբեմում մենք միշտ մարզվում էինք, որոնք շատ զավեշտալի էին անցնում: Մարիամը նույնիսկ մեկ անգամ կատակելով ասաց, որ կցանկանար առաջիկայում եւս մեկ ներկայացման մեջ աշխատենք միասին, որպեսզի շարունակենք մարզվել»:

 

Նարինե Պետրոսյանի խոսքով՝ արդեն իսկ հնչել են բազում կարծիքներ, որոնցից ստեղծագործական թիմն էլ ավելի է ոգեւորվել.

«Պրեմիերայից հետո արդեն իսկ նշանակվեցին նոր օրեր, որոնց տոմսերը գրեթե սպառված են: Ի դեպ՝ նախկինում չէր պլանավորվում, որ այդքան շատ կխաղանք այս ներկայացումը, սակայն ընթացքում հասկացանք, որ այն բավականին սիրվեց: Մենք արդեն իսկ լսել ենք բազում լավ արձագանքներ, ինչը անչափ ոգեւորիչ է. ինքս շատ շնորհակալ եմ բարձր գնահատականի համար»,- ավարտեց դերասանուհին: