Լուսինե Վարդանյան. «Կուզեմ խաղալ մի դեր, որը կունենա իր դրաման»

Past.am-ի զրուցակիցն է Երևանի Հրաչյա Ղափլանյանի անվան պետական դրամատիկական թատրոնի դերասանուհի Լուսինե Վարդանյանը:

Նա պատմել է ստեղծագործական դադարի պատճառների, սպասվող նորությունների մասին, կիսվել, թե ինչ հատկանիշներ են պետք դերասանական արվեստում ամրապնդվելու համար:

-Ի՞նչ նորություններ ունեք թատերասեր հասարակության և նրանց համար, ովքեր Ձեզ հետևում են սերիալների միջոցով:

- Նախ ասեմ, որ երեխայիս ծնվելուց հետո շատ մեծ դադար ունեցա կինոյում և թատրոնում, բայց մինչև երեխայիս ծնվելը շատ բուռն ստեղծագործական պրոցեսի մեջ եմ եղել. մինչև հղիության 7-րդ ամիսը խաղացել եմ բեմում մեծ հաճույքով և այն մտքով, որ երեխայիս եմ փոխանցում մի ամբողջ հրաշք:

Ֆիլմերում դեռ առաջարկներ չունեմ, բայց հուսով եմ, որ նոր ուժերով լցված և աշխատելու մեծ ցանկությամբ կանեմ լավ, արժեքավոր աշխատանքներ: Իսկ թատրոնում ինձ նոր դեր են վստահել: Իմ և իմ գեղարվեստական ղեկավարի՝ Արմեն Խանդիկյանի մոտ մեծ ցանկություն կա միասին աշխատելու: Ուզում եմ նրան շնորհակալություն հայտնել՝ վստահության, գնահատականի լավ խոսքերի և քաջալերման համար, աշխատանքի և ինքնադրսևորման մեջ դա ինձ ուժ է տալիս:

- Ի՞նչ տեսակ կանանց եք կարողանում հեշտությամբ մարմնավորել:

-Եթե ուզում ես որակով աշխատանք կատարել, երբեք հեշտությամբ չես մարմնավորի կերպարը, քանի որ դա ծանր աշխատանք է: Պետք է ամբողջ ուժերդ կենտրոնացնես և ավարտին հասցնես այն, ինչ քեզ վստահել են: Ինձ մոտ են ավելի դրամատիկ կերպարները, բայց հակառակ ժանրում փորձել եմ ինձ՝ երբեք չպատկերացրնելով, որ կստացվի, սակայն Արմեն Խանդիկյանը պատկերացրեց: Ուզում եմ այնպիսի դեր մարմնավորել, որը կունենա իր դրաման, և միևնույն ժամանակ կեպարիս խնդիրը կլինի համամարդկայինը:

-Արդյո՞ք համաձայն եք, որ սերիալների ռեժիսորները դերասաններին ընտրում են ըստ որոշակի կարծրատիպերի. օրինակ՝ մի դերասան կարող է միշտ հարուստ գործարարի խաղաղ, մյուսին միշտ բաժին են հասնում հանցագործի կերպարները: Խանգարո՞ւմ է այս երևույթը դերասանի ինքնադրսևորմանը:

 -Համաձայն եմ, ու ինձ թվում է, որ բոլոր երկրներում կա այդպիսի հարց, որովհետև դերասանը մարդ է և ինչ էլ խաղա, իր միջով է անցկացնում և ստացվում է, որ իր նման է դարձնում կերպարը: Թատերական տերմինով ասում են «ամպլուայի դերասան, դրա համար դերաբաշխման ժամանակ շատ հաճախ այդպես են կողմնորոշվում, բայց լավ դերասանը նույնիսկ այդ դեպքում պետք է տարբեր լինի:

-Բացի մասնագիտական տաղանդից, ի՞նչ մարդկային հատկանիշներ են պետք, որպեսզի հնարավոր լինի ամրապնդվել և դիմակայել դերասանական արվեստում:

- Եթե խոսեմ Երևանի Հրաչյա Ղափլանյանի անվան թատրոնի դերասանի մասին,ապա կհամարձակվեմ ասել՝ առաջին հերթին ՄԱՐԴ պետք է լինի և ունենա աշխատասիրություն, ճկունություն և մեծ կամքի ուժ:

- Ո՞ր դերը եղավ Ձեր այցեքարտը:

-Մեգիի դերը՝ Դրամատիկական թատրոնի Մամա միա ներկայացման մեջ:

-Ի՞նչ դեր կուզեք խաղալ կյանքի այս շրջանում:

-Դեր, որը կհուզի մարդկանց ոչ միայն արցունքներով: Գլոբալ առումով՝դերասանի գործը հենց դա է:

Հարցազրույցը՝ Լևոն Փանոսյանի