Էժան աշխաուժի միգրացիայով այժմ զբաղվում են նաև հայաստանյան գործակալություններ. ուսումնասիրություն

Եվրասիական տնտեսական միությանն անդամակցելուց հետո ՌԴ կառավարությունը ԵՏՄ անդամ երկրների քաղաքացիների համար արտոնյալ պայմաններ է ստեղծել, մասնավորապես՝ այդ երկրների քաղաքացիները կարող են Ռուսաստան մեկնել աշխատելու արտոնյալ պայմաններով:

Դեռևս անցած տարի Հայաստանի կառավարությունը հավանություն էր տվել «Ռուսաստանի Դաշնության տարածքում ՀՀ քաղաքացիների և ՀՀ տարածքում Ռուսաստանի Դաշնության քաղաքացիների գտնվելու կարգի մասին» համաձայնագրի կնքման առաջարկությանը: Ըստ այդմ, հայաստանցի միգրանտ աշխատողները և նրանց ընտանիքի անդամներն ազատվում են երկիր մուտք գործելու օրվանից 30 օրվա ընթացքում աշխատանքի տեղավորման մարմիններում գրանցվելու պահանջից: Ռուսաստանի տարածքում 30 օրից ավելի երկար մնալու դեպքում հաշվառումն արդեն պարտադիր է: Բացի այդ՝ Հայաստանի քաղաքացիները կարող են առանց աշխատանքի հատուկ թույլտվության տեղի գործատուի հետ կնքել աշխատանքային պայմանագիր և մեկ տարի ժամկետով աշխատել Ռուսաստանի տարածքում:

Եթե նախկինում ՌԴ-ում աշխատել ցանկացողները կարող էին գնալ ՌԴ ծանոթ բարեկամների, աշխատանքային միգրանտների համար գործ առաջարկող անհատների միջոցով, ապա Past.am-ը պարզեց, որ այժմ ներգաղթյալներին ՌԴ-ում աշխատանք առաջարկում են նաև հայաստանյան աշխատանքային գործակալությունները: Մասնավորապես, անվճար հայտարարությունների List.am կայքում դիտարկումների արդյունքը ցույց տվեց, որ գործակալությունները ոչ միայն առաջարկում են ՌԴ-ում զբաղվել շինարարական աշխատանքներով, այլև աշխատել սպասարկման ոլորտում, արտադրություններում, հանրային սննդի վայրերում, ընդհուպ՝ գործարաններում: Ընդ որում՝ աշխատանքի բնույթը նույնպես տարատեսակ է՝ հավաքարարից մինչև դայակ, հանդերձապահ, վարսահարդար կամ անձնական վարորդ: Յուրաքանչյուր գործակալություն առաջարկում է կեցության, սննդի, փոխադրման իր պայմանները:

Զանգահարեցինք հայտարություններից մեկում նշված հեռախոսահամարով, ներկայացանք երգչուհի և հետաքրքվեցինք, թե ինչ պայմաններով են առաջարկում մեկնել ՌԴ և աշխատել ռեստորանում: Գործակալության մենեջերը տեղեկացրեց, որ կեցությունը հոգում է ռեստորանը և ամսական 26 աշխատանքային օրվա դիմաց պատրաստ է վճարել 20 հազար ռուբլի, որը համարժեք է 140 հազար դրամի: Ռեստորանային երգչուհու համար վճարվելիք համեմատաբար փոքր հոնորարը գործակալության աշխատակիցը բացատրեց նրանով, որ կեցության ծախսերը հոգում է ռեստորանը, ապա ավելացրեց, որ ցանկացողները շատ են: Նա նշեց նաև, որ ռեստորանը չէր պատրաստվում աշխատանքային պայմանագիր կնքել:

Զանգահարեցինք այլ գործակալություն՝ ներկայանալով որպես լրագրող, ցանկացանք իմանալ, թե որքանով են պահանջված հայաստանցիները ՌԴ աշխատաշուկայում: Գործակալության գործադիր տնօրենը, ով խնդրեց, որ հրապարակման մեջ չնշենք գործակալության անունը, բացատրեց, որ ռուսական ընկերություններին, ինչու չէ նաև անհատ գործատուներին, ձեռնտու է հայաստանյան աշխատուժը: Պատճառներից մեկն այն է, որ տեղացիների հետ ստիպված կլինեն ավելի շատ վճարել և կնքել աշխատանքային պայմանագրեր, իսկ հայաստանյան աշխատուժը համեմատաբար էժան է: Հայաստանցիները շատ ավելի քիչ վճարի դիմաց կատարում են նույն աշխատանքը, որը պետք է կատարեին տեղաբնակները շատ ավելի բարձր վարձատրությամբ:

«Բացի այդ՝ գործակալությունը պատասխանատվություն չի կրում իր հաճախորդի և գործատուի միջև առաջացած աշխատանքային տարաձայնությունների, վեճերի համար: Նա չի կարող պարտադրել գործատուին, օրինակ՝ վճարել չվճարված աշխատանքի դիմաց: Աշխատանքային պայմանագիր կնքե՞լ, թե՞ ոչ, ի՞նչ պայմաններով անցնել աշխատանքի, բացառապես պետք է պայմանավորվեն գործատուն և աշխատողը, իսկ գործակալությունը պարզապես որոշ գումարի դիմաց գործատուին առաջարկում է աշխատողներ, որից հետո ավարտում իր առաքելությունը»,- պարզաբանեց տնօրենը:

Ստացվում է, որ օրենսդրական արտոնությունները հնարավորություն են տալիս ՀՀ քաղաքացիներին անարգել աշխատանքի անցնել ՌԴ-ում: Այս գործարքը փոխշահավետ է երկու կողմի համար էլ: Նախ՝ Հայաստանում գործազրկության բարձր մակարդակի պայմաններում հայաստանցիները հնարավորություն ունեն գումար աշխատել ՌԴ-ում, իսկ ռուսաստանյան գործատուներն օգտվում են էժան աշխատուժից, իսկ այդ ամենը կազմակերպելու գործն էլ իրենց վրա են վերցրել հայաստանյան գործակալությունները:

Լիլիթ Լալայան