Առաջիկա օրերին ջերմաստիճանը կիջնի մինչև 6 աստիճանով, սպասվում են տեղումներ

 Հոկտեմբերի առաջին 3 օրերին հանրապետությունում կդիտվի անկայուն եղանակ, և հոկտեմբերի 2-ից օդի ջերմաստիճանը կնվազի 3-4 աստիճանով: Այս մասին լրագրողների հետ հանդիպման ժամանակ հայտնեց ՀՀ տարածքային կառավարման եւ արտակարգ իրավիճակների նախարարության «Հիդրոմետ» ծառայության օդերևութաբանության կենտրոնի պե տի տեղակալ Գագիկ Սուրենյանը: Նրա խոսքով` միջին կլիմայական ցուցանիշների համեմատ հոկտեմբերին սեպտեմբերի համեմատ օդի միջին ջերմաստիճանը 5 աստիճանով ցածր է լինում: «Հոկտեմբերի 1-3-ը հանրապետության տարածքում եղանակը որոշակիորեն անկայուն կլինի, 1-ին և 3-ին հիմնականում հյուսիսային շրջանաներում, իսկ հոկտեմբերի 2-ին ցիկլոնի անցման պայմաններում շրջանների զգալի մասում սպասվում է անձրև և ամպրոպ, քամու ուժգնացում: Ջերմային ֆոնը ամսի 1-ին կմնա անփոփոխ, իսկ արդեն հոկտեմբերի 2-ից  կներթափանցեն որոշակի ցուրտ օդային հոսանքներ ու օդի ջերմաստիճանը կն վազի 3-4 աստիճանով»,-տեղեկացրեց Գագիկ Սուրենյանը:

Նրա խոսքով` եթե սեպտեմբերի 30-ին և հոկտեմբերի 1-ին Արարատյան դաշտում և Երևանում օդի ջերմաստիճանը ցերակային ժամերին կտատանվի 27-29 աստիճանների սահմաններում, ապա հոկտեմբերի 2-5-ին ցերեկը ջերմաստիճանը չի գերազանցի 25-27 աստիճանը: «Հոկտեմբերի 6-ից հետո հանրապետությունը կգտնվի ցիկլոնի ազդեցության գոտում, ժամանակ առ ժամանակ կդիտվեն տեղումներ, հոկտեմբերի 6-ից հետո պետք է ակնկալել օդի ջերմաստիճանի նվազում ևս 3-4 աստիճանով»,-ավելացրեց Գագիկ Սուրենյանը:

Նա միևնույն ժամանակ նշեց, որ այս տարվա հոկտեմբերը կանխատեսում են նորմայի սահմաններում, որը համահունչ է ՀՀ բազմամյա կրիմայական պայմաններին:

Ողջ ամսվա ընթացքում, ըստ Սուրենյանի, Արարատի ու Արմավիր մարզերում ամենաբարձր ջերմաստիճանները կգրանցվեն ամսվա առաջին տասնօրյակում, երբ օդի ջերմաստիճանը ցերեկը կբարձրանա 26-28  աստիճանի, իսկ ամսվա արդեն 2-րդ և 3-րդ տասնօրյակներում, պայմանավորված արկտիկական ցուրտ օդային հոսանքների ներթափանցմամբ, օդի ջերմաստիճանը գիշերային ժամերին հնարավոր է նվազի -1 +1 աստիճան:

Շիրակի, Կոտայքի, Գեղարքունիքի մարզերում, Արագածոտնի և Վայոց ձորի լեռնային շրջաններում ամսվա առաջին օրերին օդի ջերմաստիճանը կտատանվի 20-24 աստիճանի սահմաններում, իսկ ամսվա 2-րդ և 3-րդ տասնօրյակներում գիշերը սպասվում է մինչև -6 -2 աստիճան ցուրտ:

Լոռիում ամսվա առաջին օրերին սպասվում է 22-26 տաքություն, երկրորդ տասնօրյակում գիշերային ժամերին օդի ջերմաստիճանը կնվազի -4 -2-ի:

Տավուշում առաջին օրերին օդի ջերմաստիճանը բավականին բարձր կլինի, սպասվում է 25-28 աստիճան տաքություն, իսկ ամսվա 2-րդ տասնօրյակում օդի ջերմաստիճանը գիշերային ժամերին կարող է նվազել -2 +3 աստիճան:

Սյունիքում ամսվա առաջին օրերին ջերմաստիճանը կբարձրանա մինչև 26-30 աստիճան, 2-րդ տասնօրյակում գիշերային ժամերին կդիտվի 0 +5 աստիճան:

Մայրաքաղաքում ամսվա առաջին տասնօրյակում հիմնականում կդիտվի 25-27աստիճան տաքություն, իսկ 2-րդ և 3-րդ տասնօրյակներում չի բացառվում, որ գիշերային ժամերին դիտվի 1 աստիճան ցրտից 1 աստիճան տաքություն:

Գագիկ Սուրենյանը նշեց, որ այս պահին ցրտահարություններ չեն կանխատեսում, առանձին օրերին հնարավոր ցածր ջերմաստիճանի մասին կտեղեկացնեն նախօրոք: