Ինչն է կապում Տաթև Սարգսյանին և Գևորգ Սիրեկանյանին

Tert.am Life-ը գրում է

Դերասանուհի Տաթև Սարգսյանը, ով նաև երգեր է գրում, նոր աշխատանք ունի: Նա համագործակցել է երգիչ Գևորգ Սիրեկանյանի հետ և գրել «Սրտիս դու անուն» երգի խոսքերը, երաժշտության հեղինակը Գևորգն է: Համագործակցության մանրամասները Տաթևը վստահել է Tert.am Life-ին:

 «Երբ լսեցի Գևորգի «Փոխեցիր էությունս» երգը, ինձ շատ դուր եկավ: Տեսա, որ խոսքերի և երաժշտության հեղինակն ինքն է: Համագործակցության նախաձեռնողը ես էի: Այնքան անմիջական շփում եղավ, որ շատ ավելի արագ ստացվեց աշխատանքային պրոցեսը: Երգն արդեն պատրաստ է: Այս աշխատանքը թե՛ երաժշտության, թե՛ խոսքերի առումով համատեղ է եղել: Իհարկե, երկուսի կմախքն էլ եղել է, սակայն մեկս մյուսիս լրացնելով ավելի գեղեցիկ աշխատանք ստացանք»,- պատմեց Տաթևը:

 Դերասանուհին հայտնեց, որ արդեն պատկերացնում են՝ ում կարող են առաջարկել այսդ գործը. «Հայտնի երգիչ է, անունը դեռ չեմ նշի, քանի որ նոր պետք է անենք առաջարկը: Փոքրիկ նյուանսներ են մնացել: Վերջնական տեսքի բերենք և կառաջարկենք: Իմ պատկերացմամբ՝ հենց ինքը կարող է փոխանցել երգի հոգեվիճակը: Շատ ազդեցիկ երգ է: Ինչպես միշտ, լիրիկական է»:

 Թեև Տաթևը հաճախ երգեր չի ներկայացնում հանդիսատեսին, նշեց, որ միշտ է ստեղծագործական պրոցեսի մեջ: «Գրելիս և՛ լիցքաթափվում եմ, և՛ լիցքավորվում: Դա նաև ինքս ինձ բացահայելու միջոց է, դրա համար միշտ գրում եմ: Շատ դեպքերում ընկերներս էլ են ոգևորում ինձ՝ խնդրելով գրել իրենց կյաքի այս կամ այն իրավիճակի մասին: Հատկապես, երբ տաղանդավոր մարդկանց հետ աշխատելու հնարավորություն է լինում, չեմ խնայում ո՛չ ժամանակս, ո՛չ էներգիաս»,- նշեց նա:

 Մոտ 3 տարի է Տաթևը հեռուստաէկրաներին չէ: Նա նշեց, որ առաջիկա 2 ամսվա ընթացքում կնկարահանվի նոր նախագծում: «Երրորդ տարին է, ինչ այս ոլորտում չեմ, սակայն մինչև հիմա ստանում եմ հաղորդագրություններ,  մեկնաբանություններ, թե երբ եմ վերադառնալու: Փոքր-ինչ հիասթափված էի, քանի որ չէի գնահատվում այն մարդկանց կողմից, ումից առաջնային սպասում էի, որ պետք է գնահատված լինեմ, գնահատված չես, սակայն չեմ ուզում խոսել: Չեմ կարծում, որ կարիք կա անդրադառնալ այն ամենին, ինչ մնացել է անցյալում»,- ասաց նա:

 Քանի որ Տաթևը հանրությանը հայտնի է դարձել Դիանա Գրիգորյանի սերիալի միջոցով, դադարից առաջ էլ նրա սերիալու էր խաղում, հետաքրքրվեցինք, թե այժմ ինչ հարաբերություններ ունի Դիանայի  հետ: «Միշտ շնորհակալ եմ լինելու իրեն, քանի որ ինքն է այդ ամենը բացահայտել իմ մեջ: Կերպարս ինչ-որ չափով սիրվեց, ընկալվեց,  թեկուզ սխալ, այնուամենայնիվ, տպավորվեց մարդկանց հիշողության մեջ: Միշտ իրեն շնորհակալ եմ լինելու այդ դերի համար, որովհետև հենց այդ դերի շնորհիվ ձեռք բերեցի շատ մտերիմ ընկերներ: Մենք շատ ցիվիլ, հաճելի հարաբերություններ ունենք: Երբ հանդիպում ենք, միշտ ուրախ ենք տեսնել միմյանց»,- ասաց Տաթևը:

 Դերասանուհին այժմ զբաղվում է միջոցառումների կազմակերպմամբ: «Այդ ամենի մեջ ոգևորող և շարժիչ բան կա, հատկապես, երբ տեսնում ես, որ քո մտահղացման շուրջ այդքան մարդ հավաքվում և ուրախանում է: Դա ստիմուլ է տալիս, որ շարունակես աշխատել»,- եզրափակեց Տաթևը: