Հարկադիր ուսուցում բոլոր մարզպետների համար, իսկ քննությունը՝ օնլայն՝ բոլորի աչքի առաջ

ՀՀ Կառավարության նիստի ժամանակ վարչապետ Կարեն Կարապետյանն իր դժգոհությունը հայտնելով մարզպետների աշխատանքից՝ նշել էր, որ բնակիչների հետ հանդիպումները փաստում են, որ նախորդ տարեվերջին համայնքների ղեկավարներին տրված՝ համայնքների զարգացման ծրագիր կազմելու նոր մեթոդաբանության հանձնարարականը կատարելիս ղեկավարներն այն կա՛մ շատ քիչ են քննարկել բնակիչների հետ, կա՛մ առհասարակ չեն քննարկել:

«Արձանագրվել են դեպքեր, երբ բնակիչները տեղյակ չեն եղել դրանց մասին կամ բարձրաձայնում են համայնքի համար կարևոր հիմնահարցեր, որոնք նույնիսկ տեղ չեն գտել այդ ծրագրի մեջ»,– ասել էր վարչապետը:

Նա նաև տարածքային կառավարման և զարգացման նախարարին և մարզպետներին հանձնարարել էր մեկամսյա ժամկետում կազմակերպել համապատասխան ծրագրերի վերանայման գործընթաց՝ համայնքների բնակիչներին լիարժեք ներգրավելով համապատասխան քննարկումներում: 

Անդրադառնալով համայնքների ղեկավարների ու մարզպետների տարածքային կառավարման հմտությունները բարձրացնելուն՝ վարչապետը նշել էր, որ Ամերիկյան համալսարանի հետ արդեն պայմանագիր է կնքվել, որ բոլոր մարզպետները համապատասխան դասընթացներ անցնեն:

«Փաստը» փորձեց մարզպետներից ճշտել, թե իրենք ինչ կարծիք ունեն այդ դասընթացն անցնելու մասին և իրենց կարծիքով կառավարման ոլորտի հատկապես որ բացը կփակի այն:

Արմավիրի մարզպետ Աշոտ Ղահրամանյանը «Փաստի» հետ զրույցում նշեց, որ ինքը շատ նորմալ է վերաբերվում այդ առաջարկին և, իր կարծիքով, մարդը քանի դեռ ապրում է, պետք է նաև սովորի:

«Ամեն տարի և՛ գիտությունը, և՛ կառավարման մեթոդները առաջ են գնում: Եվ ես կարծում եմ, որ ոչ բոլոր կառավարչական մեթոդներին է հնարավոր լինում տեղեկանալ: Այնպես որ այդ բացերը լրացնելու համար է մեր վարչապետն ասել: Բացի այդ, այն թույլ կտա ծանոթանալ աշխարհի առաջավոր փորձին»,– ասաց Ա. Ղահրամանյանը:

Դիտարկմանը, թե այսօր համացանցը թույլ է տալիս, ցանկության դեպքում ծանոթանալ այն ամենին, ինչը հետաքրքիր է: Եվ դրա համար առանձնապես պետք չէ ո՛չ ուսուցիչ վարձել, ո՛չ մեծ գումարներ ծախսել: Ուստի արդյոք միայն աշխարհի բոլոր երկրների առաջավոր փորձին ծանոթանալու համար արժե նման դասընթացի մասնակցել, թե՞ այն ավելի խորը նպատակ է հետապնդում, Արմավիրի մարզպետն ասաց. «Ես չգիտեմ, թե ինչ գումարների մասին է խոսքը, բայց շատ ու շատ առաջավոր փորձեր էլ կան, որ ընդհանրապես համացանցերում ոչ երևում է, ոչ էլ պատկերացում ունենք այդ մասին: Եվ ես կարծում եմ, որ վերապատրաստումը կարևոր գործընթաց է»:

Նա նաև տեղեկացրեց, որ նույն խնդիրն այսօր կա նաև գյուղատնտեսության ոլորտում, քանի որ ոչ բոլոր գյուղացիներն են, որ լավ գյուղատնտեսներ են: Եվ մտածել, թե գյուղում է ապրում, ուրեմն լավ գյուղատնտես կլինի, ճիշտ չէ, քանի որ գյուղում ապրող շատ մարդիկ կան, որ աշխարհի առաջավոր փորձի մասին ընդհանրապես տեղեկություն չունեն: 

Ի դեպ, Արագածոտնի մարզպետ Գաբրիել Գյոզալյանը լսելով հարցն ասաց, որ ինքն այդ պահին Թալինում քարոզարշավի է մասնակցում և խնդրեց ավելի ուշ զանգահարել: Բայց հետո, հավանաբար սարսափելի զբաղված լինելու պատճառով, նա այդպես էլ չպատասխանեց մեր զանգերին: Ուստիև հնարավոր չեղավ իմանալ, թե դասընթացների ժամանակ Արագածոտնի մարզպետը հատկապես որ բացը վերացնելու վրա է փորձելու իր ուշադրությունը սևեռել: 

Իսկ Գեղարքունիքի մարզպետ Ռաֆիկ Գրիգորյանն էլ «Փաստին» ասաց, որ լինելով պատգամավորության թեկնածու ինքն այս պահին արձակուրդի մեջ է և շատ տեղեկությունների չի հասցնում ծանոթանալ: Իսկ նման հարցերի ավելի հանգամանալից անդրադառնալու համար խնդրեց դիմել ԱԺ պատգամավորական ընտրությունների ավարտից հետո:

Նշենք նաև, որ հիմնվելով անցյալի տխուր փատերի վրա մտավախություն կա, որ մարզպետները կամ ծանոթ–բարեկամ կխառնեն դասընթացին չմասնակցելու համար, կամ էլ հիվանդության մասին տեղեկանք կհանեն, որպեսզի խուսափեն թուղթ ու գրիչը ձեռքին դաս պատասխանելու «դարդից»: Եվ որպեսզի այս գործընթացի հանդեպ արժանահավատություն լինի, հարկավոր է ոչ միայն այդ դասընթացն օնլայն հեռարձակել, այլ նաև՝ քննությունը, ինչը հնարավոություն կտա գնահատել թե՛ մարզպետների նոր կարողությունները և թե՛ ծախսված գումարների արդյունավետության աստիճանը:

Արմինե Գրիգորյան