Իմ կյանքն ինձ ապացուցել է, որ ոչինչ չպետք է բացառել. Մարիամ Ադամյան

Life.panorama.am-ը դերասանուհի Մարիամ Ադամյանի հետ զրուցել է աշխատանքային ծրագրերի եւ «Սերը տարիք չի հարցնում» ներկայացման մասին:

 

«Այժմ նկարահանվում եմ «Շանթ» հեռուստաընկերության  «Օտարը» հեռուստասերիալում: Այստեղ հենց սկզբից չեմ երեւում, հայտնվելու եմ հետաքրքիր իրավիճակում, որը անակնկալ կլինի: Մարմնավորում եմ ինձ համար շահեկան մի կերպար, որն ունի հետաքրքիր գույներ ու խաղալն ինձ հաճելի է: Նա դրական հերոսուհի է, բայց ինչպես հատուկ է հայկական սերիալներին` չես իմանա, թե արդյոք հերոսդ մինչեւ նախագծի ավարտը դրական կմնա»,- նշեց Մարիամը:

«Շանթ» հեռուստաընկերության անձնակազմը Մարիամ Ադամյանի համար արդեն հարազատ է դարձել, քանի որ գրեթե նույն խմբի հետ աշխատել է «Թաքնված սեր» հեռուստասերիալում: Իր խոսքով` «Շանթի» հետ աշխատելու ընթացքում իր կարեւոր ձեռքբերումը նոր ընկերուհի ունենալն է.

 

«Մեզ մոտ հիմնականում աշխատանքային գործընթաց է: Բոլորն էլ միտված են աշխատանքին ու ինքս գործից դուրս այնքան էլ մեծ շփում չունեմ խմբի հետ: Միաժամանակ, ինձ այստեղ շատ հարմարավետ եմ զգում, քանի որ բոլորն էլ իրենց գործը լավ են հասկանում եւ ունեն նպատակ` լավ արդյունք ունենալ: Այս թիմի հետ աշխատելն ինձ հնարավորություն տվեց ունենալու դերասանուհի Գայանե Բալյանին, ով արդեն իմ մտերիմ ընկերուհին է: Մենք իրար շատ լավ ենք հասկանում ու միասին միշտ հետաքրքիր ժամանակ ենք անցկացնում: Ի դեպ` «Օտարը» հեռուստասերիալում նրա հետ կրկին համատեղ տեսարաններ ունենք»,- նկատեց նա:

Մարիամ Ադամյանի համար կարեւոր իրադարձություն էր վերջերս Հ. Ղափլանյանի անվան դրամատիկական թատրոնի «Սերը տարիք չի հարցնում» ներկայացմանը մասնակցելը: Խոսելով թատրոնային գործունեության մասին` դերասանուհին պատմեց երազանքների թատրոնում հայտնվելու եւ սպասված ներկայացման մասին.

 

«Դրամատիկական թատրոնում ժամանակ առ ժամանակ քննություն է հայտարարվում, որի ժամանակ կարող ես հայտ ներկայացնել ու փորձել ուժերդ այս թատրոն մուտք գործելու համար, ինչը եւ ես արեցի: Այս թատրոնն իսկապես երազանքի նման մի բան է շատ դերասաների համար: Ինձ համար էլ սա միակ թատրոնն էր, որտեղ ուզում էի աշխատել: Իսկապես իմ բախտը բերեց, ինչի համար շատ շնորհակալ եմ: Առանձնահատուկ շնորհակալ եմ Հրաչյա Հարությունյանին, ով վստահեց ինձ ներկայանալ իր ներկայացման մեջ»,- պատմեց Մարիամն ու խոսեց «Սերը տարիք չի հարցնում» ներկայացման մասին, որի պրեմիերան կայացավ բոլորովին վերջերս.

«Դրամատիկական թատրոնում որպես ներմուծված դերասանուհի խաղում եմ «Ախ Աննա, Աննա կամ կրքոտ կիրակի» ներկայացման մեջ: Իսկ «Սերը տարիք չի հարցնում»-ն առաջին ներկայացումն էր, որն ի սկզբանե նաեւ իմ վրա էր կառուցվել: «Սերը տարիք չի հարցնում» ներկայացման իմ հերոսուհուն անմիջապես սիրեցի: Նա հետաքրքիր է, անկաշկանդ, ով չի ամաչում, որ սիրում է իրենից տարիքով մեծ տղամարդու, նա չի կաշկանդվում իր սիրո մասին խոսելուց, իսկ դա մեծ առավելություն է մարդու համար: Սիրում եմ, երբ իմ հերոսն ամբողջությամբ բաց է ինձ համար` ես գիտեմ իր բնավորությունն ու դա շատ հեշտ է դարձնում իմ մեջ նրա կերտումը: Պետք է ասեմ, որ պարոն Հարությունյանի հետ աշխատելը մեծ հաճույք է: Մի ուրիշ զգացողություն է, երբ տեսնում ես, որ քեզ համար սրտացավ են, մտահոգ եւ ուրախանում են քո հաջողություններով, ինչը արեց Հրաչյա Հարությունյանը: Հիմա էլ անհամբերությամբ սպասում եմ, թե երբ ենք այս ներկայացումը կրկին խաղալու»,- հավելեց դերասանուհին:

 

Մեր նկատառմանը, թե Մարիամ Ադամյանը համաձա՞յն է այն մտքի հետ, որ սերը տարիք չի հարցնում եւ արդյոք նա պատրաստ կլինի իրենց շատ մեծ տարիքով տղամարդու սիրել, երիտասարդ դերասանուհին պատասխանեց.

«Հիմա ասում եմ, որ հազիվ թե ինձ հետ նման բան լինի, ինքս ուղղակի չեմ պատկերացնում դա, բայց եւ իմ կյանքն ինձ ապացուցել է, որ ոչինչ  չպետք է բացառել: Կյանքումս շատ բաներ եմ ասել` ինձ հետ երբեք նման բան չի լինի, որոնք վերջին մեկ տարում եղան, այնպես որ փորձում եմ ոչինչ չբացառել ու չպլանավորել: Հատկապես սերն այնպիսի բան է, որ ոչ մեկ չգիտի, թե երբ այն կզգաս եւ ում հանդեպ»: