Շառլ Ազնավուր. 92 տարեկանում բեմ բարձրանալով՝ ամեն անգամ ռիսկի եմ դիմում

92 տարեկանում բեմ բարձրանալով՝ ամեն անգամ ռիսկի եմ դիմում, որ լիարժեք համերգ անցկացնեմ՝ առանց ընդմիջման եւ մի կում ջրի: Այս մասին «Չաստնի կորեսպոնդետ»-ի հետ հարցազրույցում հայտարարել է լենգենդար շանսոնյե Շառլ Ազնավուրը՝ պատասխանելով այն հարցին, թե պատրաստ է ռիսկի դիմել:

«Իհարկե: Ամեն անգամ ռիսկի եմ դիմում՝ 92 տարեկանում բեմ բարձրանալով, որ լիարժեք համերգ անցկացնեմ՝ առանց ընդմիջման եւ մի կում ջրի: Հաշվի չեմ առնում երկրագնդի բոլոր կետեր շատ ժամեր տեւող թռիչքները: Համերգային շրջագայության ընթացքում երբեմն չորս երկիր եմ թռչում: Ես մինչ օրս ինքս ինձ մարտահրավեր եմ նետում: Հիմա ցանկանում եմ մեկնել այն եզակի անկյունները, որտեղ չի հաջողվել երգել, օրինակ՝ Չինաստան կամ Հարավային Կորեա»,- նշել է շանսոնյեն:

Ազնավուրի խոսքով՝ երբ երիտասարդ ես եւ ելույթ ես ունենում արտիստի թեժացրած բեմում, երբեք չես իմանա, թե հանդիսատեսն ինչպես քեզ կարձագանքի: Բայց երբ նա գալիս է հատուկ քեզ համար՝ դա արդեն այլ բան է. «Դրանից զատ, իմ հանդիսատեսը հավատարիմ է, նվիրված, եւ ես նրա հետ ինչպես հին ընկերոջ եմ հանդիպում: Նախկինում իմ մտքերով դահլիճի հետ չէի կիսվում, հիմա հանդիսատեսի հետ շատ բաների մասին եմ անկեղծ զրուցում: Օրինակ՝ որ հիշողությունս երբեմն ինձ դավաճանում է: Դե, բայց ինչպե՞ս հիշես գրած հազարից ավելի երգերը: Այդ պատճառով հուշարարների եմ օգտագործում: Բոլոր արտիստները գործնականում դա անում են, բայց ես միակն եմ, որ պատրաստ եմ հրապարակավ ասել»:

Ինչ վերաբերում է երաժշտությանը, որը Ազնավուրը լսում է, ապա նա նշեց, որ նախապատվություն է տալիս փողոցային երաժիշտներին: «Համերգային շրջագայություն կատարելիս սիրում եմ փողոց դուրս գալ եւ լսել փողոցային երաժիշտներին: Եթե ժամանակ եմ ունենում, մշտապես երաժշտական խանութ եմ մտնում, նոր սկավառակներ եմ փնտրում, որոնք հետս եմ տանում: Օրինակ՝ Բրազիլիայում վերջին շրջագայությունից հետո բերեցի Սիմոնայի սկավառակը»,- նշել է նա:

Ի պատասխան հարցին՝ եթե կարողանայիք ձեր ամբողջ երաժշտությունը մեկ պատկերով ներկայացնել, ապա դա ի՞նչ կլիներ, շանսոնյեն նշել է. «Ես այնքան տարբեր երգեր եւ սյուժեներ եմ ստեղծել…կարծում եմ՝ անհնար կլինի դա մեկ պատկերի մեջ տեղավորել: Այն ավելի շուտ կնմանվեր Բոսխի որմնանկարին»: