51+–ով կոալիցիա` Ծառուկյանի հետ կամ ղեկավարել հետընտրական զարգացումները. ՕՐՕ ծրագիրը. «Փաստ»

«Փաստ» օրաթերթը գրում է.

«Օհանյան–Րաֆֆի–Օսկանյան» դաշինքի ու Արցախի Պաշտպանության բանակի նախկին ղեկավար Սամվել Բաբայանի ձերբակալության շուրջ նոր զարգացումները՝ Վրաստանում այդ գործով ՀՀ քաղաքացու ձերբակալությունը, մամուլում շրջանառվող տեղեկությունը, թե հնարավոր է Սեյրան Օհանյանին ներգրավեն այդ գործով, ՕՐՕ դաշինքում իշխանության տեխնոլոգիա են համարում՝ ուղղված իրենց մուտքը խորհրդարան կամ ընտրությունների կեղծման դեպքում` հետընտրական պրոցեսները խոչընդոտելուն:

ՕՐՕ–ի շտաբում պնդում են, որ իրենց իսկ կատարած հարցումներով պարզել են, որ ՕՐՕ–ն 10+ տոկոս ձայն ունի, եթե իշխանությունը չգնա կեղծիքի ու իրենց հաշվին կառավարելի ուժի չմտցնի ԱԺ: ՕՐՕ–ում կարծում են, որ «Ծառուկյան» դաշինքը 40+ ձայն ունի ու իրենք Ծառուկյանի հետ կարող են 51+ ձայնով կոալիցիա կազմել: «Եթե Ծառուկյանը 40+ ձայն հավաքի, մենք՝ 10+, ապա ոչինչ չի խանգարի կոալիցիա կազմել, անգամ Սերժ Սարգսյանը չի կարողանա խանգարել»,– «Փաստի» հետ զրույցում համոզմունք հայտնեց ՕՐՕ–ի ղեկավարներից մեկը:

Հաջորդ սցենարով ՕՐՕ–ն պատրաստ է կեղծիքների դեպքում առաջնորդել հետընտրական ժողովրդական շարժումը: «Բնականաբար առաջնորդելու ենք: Եթե ընտրակեղծարարության դեպքում հրապարակ գա 50 հազար քաղաքացի, ապա այո՛, մենք կառաջնորդենք այդ շարժումը»,– «Փաստի» հետ զրույցում ասաց ՕՐՕ ներկայացուցիչը՝ հավելելով, որ պատրաստ են «գործիք դառնալ ժողովրդի» ձեռքին:

Ըստ ՕՐՕ–ի՝ հենց սրանից է, որ խուսափում է իշխանությունը, ու սա է պատճառը, որ իշխանությանը պետք էր քրեական գործ՝ ՕՐՕ–ի առաջնորդներին հնարավորության դեպքում չեզոքացնելու համար. թերևս պատահական չէ, որ մամուլում շրջանառվեց Օհանյանին զգուշացում–տեղեկությունը, թե կոշտ հայտարարությունների դեպքում հնարավոր է ներգրավվի Սամվել Բաբայանի դեմ հարուցված «Իգլայի» գործով:

Հիշեցնենք, որ դեռ վերջնական կարճված չէ ՕՐՕ առաջնորդներից ԱԳ նախկին նախարար Վարդան Օսկանյանի որդու դեմ հարուցված քրգործը: Ըստ հարուցված քրգործի նյութերի՝ Արա Օսկանյանն ու նրա մորաքրոջ որդի Հրանտ Սիրադարյանը Լենինգրադյան փողոցում գտնվող «Ռոբերտո» խանութի մոտակայքից առևանգել էին Նժդեհ Բերբերյանին, նստեցրել ավտոմեքենա և տարել Աբովյան քաղաք, բռնությամբ ու նրա կամքին հակառակ պահել մեքենայի մեջ՝ պահանջելով վերադարձնել 1,5 միլիոն ՀՀ դրամի պարտքը:

ՕՐՕ–ն այսօր կամա–ակամա դարձել է իշխանության համար ամենաանվերահսկելի ուժը, բնականաբար, հանգամանքների բերումով: Բացի դա՝ այսօր դաշինքի հետ են «Սասնա ծռերը»:

Սամվել Բաբայանի կողմնակից, ԼՂՀ ԱԺ պատգամավոր Հայկ Խանումյանը համոզված է, որ Սամվել Բաբայանի ձերբակալության նպատակը ՕՐՕ–ին խանգարելն է: «ՕՐՕ–ի թիմը ճիշտ կանի, որ ոչ թե ձերբակալությամբ զբաղվի, դրանով թող փաստաբաններն զբաղվեն, այլ շարունակի ակտիվ քարոզարշավը: Այսինքն՝ ձերբակալության նպատակը քարոզարշավին խանգարելն էր, ուստի ՕՐՕ–ի թիմը պետք կենտրոնանա քարոզարշավի վրա: Կարծում եմ, Բաբայանի ձերբակալությամբ դաշինքի ունակությունները որոշակի կթուլանան: Սամվել Բաբայանը կազմակերպչական ներուժ ուներ, որն օգտագործում էր ի շահ ՕՐՕ–ի: Բաբայանին չեզոքացնելով, կազմակերպչական ներուժն են փորձում փոքրացնել»,– «Փաստի» հետ զրույցում ասաց Խանումյանը:

ՕՐՕ դաշինքի հետընտրական սցենարին է երեկ անդրադարձել ՀՀԿ փոխնախագահ Արմեն Աշոտյանը՝ «Մեդիա կենտրոնի» ասուլիսում հայտարարելով, որ «Օհանյան–Րաֆֆի–Օսկանյան» դաշինքը տապալել է իր առաջին երկու պլանները:

«ՕՐՕ–ն տապալեց իր լուրջ քարոզարշավը, հեղինակությունը, ինչպես նաև տապալվեց հալածյալի կերպար ստանալը՝ տարբեր միջադեպերի և գնահատականների միջոցով: ՕՐՕ–ն երեկվանից, կարծես թե, անցել է պլան C–ի. եթե իրենց մոտ չի ստացվում, պետք է անպայման ինչ–որ մեկին կպնել»,– հայտարարեց Աշոտյանը:

Միևնույն ժամանակ ՀՀԿ փոխնախագահը զգուշացրեց քաղաքական մյուս ուժերին.

«Ես հասկանում եմ որոշ քաղաքական շրջանակների «բզբզոցները», եթե «բզբզելու» լինենք, «Ելք»–ի և «Ծառուկյան» դաշինքի ներսում նույնքան բզբզելու բան կա»:

Շարունակությունը` «Փաստ» օրաթերթի այսօրվա համարում: