Կոմկուսի առաջնորդը՝ ինովացիոն տեխնոլոգիաների, պառակտումների և այլ հարցերի մասին

Past.am-ի զրուցակիցն է Հայաստանի Կոմունիստական կուսակցության առաջնորդ Տաճատ Սարգսյանը:

-Երջանկահիշատակ Սերգեյ Բադալյանի մահվանից հետո կոմունիստները հաջողություն չունեցան և երբեք չհայտնվեցինք ԱԺ-ում: Ի՞նչ հույս կա, որ այս անգամ հաջողությունը կժպտա:

-Եթե որոշ ժամանակ չենք անցել, ապա դա նշանակում է, որ չե՞նք կարող մասնակցել և անցնել:

-Ի՞նչ պայմաններ են փոխվել:

-Բադալյանից հետո մենք չհայտնվեցինք Ազգային ժողովում, որովհետև 2003, 200, 2012 թվականների ընտրություններին շատ անարդար գտնվեցին կոմունիստների հանդեպ՝ կեղծելով մեր ձայները: Բայց դա պատճառ չէ, որ մենք չմասնակցենք: 2012-ից հետո մենք վերակառուցում արեցինք, այդ ընթացքում ավելացրել ենք կուսակցության շրջանային կառույցները: Մասնակցելով այս քարոզարշավին՝ մենք գիտենք, որ ժողովուրդը, աշխատավորությունը մեզ սպասում է: Դա վկայեցինք մեր հանդիպումները:

- Վերջին տասնհինգ տարիներին Կոմունիստական կուսակցությունը տարբեր ղեկավարների գլխավորությամբ է մասնակցել ընտրություններին: Ինչո՞ւ են փոքրիկ կուսակցությունում պառակտումներն այդքան շատ:

- Պառակտում չի եղել: Որոշ մարդիկ դուրս են եկել առանջին կուսակցություններ են ստեղծել, օրինակ՝ Առաջադիմական Կոմունիստական կուսակցություն: Բայց հիմա նրանք բոլորը մեր ցուցակում են և մեզ հետ մասնակցում են:

-Ինչպե՞ս կարողացաք այս մեկ ամսում ասելիք փոխանցել ժողովրդին:

-Բոլոր տարբերակներից օգտվել ենք: Հանդիպումների ենք գնացել, հեռուստատեսությամբ ելույթ ենք ունեցել և այլն: 24 ժամ աշխատում ենք: Երեկ այցելեցինք, Գյումրի, Արթիկ, Արագած: Հարցազրույցի պահին Սպիտակում ենք:

-Տնտեսության զարգացման ի՞նչ ծրագրեր եք ներկայացնում հանրությանը:

-Մենք այն կարծքին ենք, որ սոցիալական անբավարար վիճակը պայմանավորված է արդյունաբերության զարգացման թույլ մակարդակով: Պետք է շեշտը դնել արդյունաբերության, գյուղատնտեսության զարգացման վրա: Դա հնարավորություն կտա կանխել արտագաղթը և բարենպաստ պայմաններ ստեղծել:

-Գյուղատնտեսությունը կարևոր ոլորտ է մշտապես: Բայց այսօր զարգանում են նաև համակարգչային, ինովացիոն տեխնոլոգիաները: Դրա վերաբերյալ որևէ բան կա՞ Կոմկուսի ծրագրում:

-Երկրում մեծանում է շատ լավ երիտասարդություն: Նրանք տիրապետում են տեխնիկային և տեխնոլոգիաներին: Պետք է ՀՆԱ-ից ավելի շատ տոկոսներ բաժին տալ գիությանը, որպեսզի ոլորտը զարգանա: Դա նաև կբերի արդյունաբերության, ռազմական արդյունաբերության զարգացմանը: Գտնվելով ո՛չ պատերազմ, ո՛չ խաղաղություն վիճակում՝ մենք դրա կարիքը շատ ունենք:

Հարցազրույցը՝ Լևոն Փանոսյանի