Գեղարքունիքի մարզպետը պարգեւատրել է 100 տարին բոլորած 10 տարեցների

Տարեցների միջազգային օրվա կապակցությամբ Գեղարքունիքի մարզպետ Ռաֆիկ Գրիգորյանը պարգեւատրել է 100 տարվա շեմն անցած 10 տարեց մարդկանց: Ինչպես տեղեկացրին Գեղարքունիքի մարզի աշխատակազմից, մարզպետի կողմից դրամական պարգեւի են արժանացել Սեւան քաղաքի բնակիչ, 100 տարեկան Արաքսյա Մկրտչյանը, Լճափ գյւղի բնակիչ, 100 տարեկան Երուն Մանուկյանը, Վարդենիս քաղաքի բնակիչ, 102 տարեկան Ծաղիկ Սաֆարյանը, Ճամբարակ քաղաքի բնակիչ, 103 տարեկան Վարդանուշ Ոսկանյանը, Դպրաբակ գյուղի բնակիչ, 101 տարեկան Մարգարիտ Տավարածյանը, Երանոս գյուղի բնակիչ, 113 տարեկան Դուրմեն Փինաչյանը, Ձորագյուղ գյուղի բնակիչ, 101 տարեկան Շուշիկ Ավետիսյանը, Զոլաքար գյուղի բնակիչ, 101 տարեկան Խանում Տոնեյանը, Վարդաձոր գյուղի բնակիչ, 100 տարեկան Արեւհատ Մարգարյանը եւ Արվանիստ գյուղի բնակիչ, 100 տարեկան Անախանում Սարգսյանը:

Մարզպետի անունից տարեցներին այցելել, դրամական պարգեւները եւ շնորհավորանքի խոսքերը փոխանցել են Գեղարքունիքի մարզպետարանի աշխատակազմի պատասխանատու աշխատակիցները:

Մարզպետ Ռաֆիկ Գրիգորյանը միաժամանակ շնորհավորական ուղերձ է հղել մարզի տարեցներին, որում ասված է.

«Հարգարժան տարեցներ, Ձեր ապրած կյանքում դուք թողել եք մնայուն վաստակ ու անուն, սերունդներ, որոնք շարունակում են մեր աշխարհի շենացման ու պաշտպանության գործը, ընտանեկան ու ազգային սուրբ ավանդները:

Ձեզ մաղթում եմ ամենայն բարիք ու անհոգ ծերություն, ընտանեկան հոգատարությամբ շրջապատված երջանկություն»: