«Զարմանալի ու անսովոր». «YellowStones»-ը ներկայացրեց իր առաջին ձայնասկավառակն ու տեսահոլովակը

 «YellowStones» խումբը հանրությանը ներկայացրեց իր առաջին ձայնասկավառակը «Զարմանալի ու անսովոր» անվանմամբ։ «Արմենպրես»-ի հետ զրույցում խմբի մեներգիչ Լևոն Սարգսյանն ասաց, որ ձայնասկավառակում տեղ է գտել 12 երգ։ Մարտի 30-ի շնորհանդեսային երեկոյի ընթացքում դրանցից 11-ը նրանք կատարեցին կենդանի նվագակցությամբ, իսկ մեկը ցուցադրվեց տեսահոլովակի տեսքով։ «Բոլ որ երգերը հայերեն են, կա երեք հայտնի գուսանական երգերի մշակում մեր մեկնաբանությամբ և մնացած ինը մեր սեփական ստեղծագործություններն են»,- նշեց Լևոն Սարգսյանը։ 

Տեսահոլովակը «Նազան իմ յարը» ժողովրդական երգի հիման վրա է նկարահանված, որը համացանցում հանրության համար հասանելի կլինի ապրիլի 5-ից։ 
Խմբի պրոդյուսեր Էդգար Հոկտանյանն էլ իր հերթին ասաց, որ փետրվարից աշխատում են ձայնասկավառակի պատրաստման ուղղությամբ. անցած ամիս նաև տեսահոլովակն են նկարահանել։ 
YellowStones խումբն իր համերգային գործունեությունը սկսել է 2013 թվականից։ Խմբի անվան ընտրությունն ունի խորհրդավոր ու հետաքրքիր պատմություն։ Աշխարհի ամենամեծ ազգային պարկերից մեկի անունը, որը հայտնի է իր բնական հրաբխային գեյզերներով ու գեղեցիկ միջավայրով, YellowStones խմբի անվան հիմնական մասն է կազմում։ Տղաներն իրենց սկսեցին պատկերացնել դեղին քարերի կերպարներով,այժմ էլ դեղին տարրերը դարձել են խմբի համար տարբերակիչ ու առանձնահատուկ այցեքարտ։ 5 տղաներից բաղկացած խումբը սկզբնական շրջանում հանդես է եկել համաշխարհային լավագույն հիթերի յուրովի մեկնաբանմամբ։ Խումբը ներկայանում է տարբեր ժանրերում, հիմնականում ռոքնռոլ, ֆանկ, սոուլ, բյուզ-ռոք ժանրերի համաշխարհային հիթերով։ Խմբի յուրաքանչյուր անդամ իր ուրույն մոտեցումն ու նախասիրություններն ունի երաժշտության մեջ, ինչն էլ նրանք մեծ սիրով համադրում են ու ներկայացնում հանդիսատեսին։ Խումբն աշխատում է նաև հեղինակային երգերի վրա, ստեղծագործում են ռոքնռոլ, քանթրի, ռոք, էթնո ռոք և այլ ժանրերում, որոնք ներառված են ձայնասկավառակում։

VAN Music Awards ամենամյա մրցանակաբաշխության ժամանակ 2015 թվականի մայիս ամսվա հաղթող ճանաչվեցին իրենց Funny Toy ստեղծագործությամբ։ YellowStones խումբը հանդես է գալիս երևանյան լավագույն ակումբներում, ժամանցի վայրերում, համերգային դահլիճներում։ Մասնակցել են նաև տարբեր բարեգործական միջոցառումների։