ՀՎԿ-ն կլինի խորհրդարան մտած կուսակցությունների առաջին եռյակում. Արթուր Բաղդասարյան

«Հայկական վերածնունդ» կուսակցության առաջնորդ Արթուր Բաղդասարյանի պնդմամբ` ՀՎԿ-ն կլինի խորհրդարան մտած քաղաքական ուժերի առաջին եռյակում: «Արմենպրես»-ի հաղորդմամբ` այսօր քարոզարշավի ամփոփմանը նվիրված մամլո ասուլիսի ժամանակ «Հայկական վերածնունդ» կուսակցության նախագահը, անդրադառնալով անցկացված սոցիոլոգիական հարցումներին, նշեց, որ Հայաստանում դեռևս չի եղել ընտրություն, որից առաջ, ըստ Բաղդասարյանի, նման կեղծ կամ պատվիրված հարցումներով չողողեն քաղաքական դաշտը: 

«Ինչպես ընդունված է ամբողջ աշխարհում, Հայաստանում ևս կան կազմակերպություններ, որոնք պատվերով հարցումներ են կատարում: ՀՎԿ-ն նման ծառայություններից չի օգտվել: Ուզում եմ պնդել, որ ՀՎԿ-ն կլինի խորհրդարան մտած քաղաքական ուժերի առաջին եռյակում: Վայրեր կլինեն, որտեղ կգրավենք առաջին, երկրորդ և երրորդ տեղերը: Ես քսանամյա փորձ ունեցող քաղաքական գործիչ եմ, և, եթե ինձ թույլ եմ տալիս նման եզրահանգում անել, ապա մի քանի օր հետո, ինձ թվում է, դրանում բոլորս կհամոզվենք»,- ասաց նա` շնորհակալություն հայտնելով բոլոր հայրենակիցներին, ովքեր կքվեարկեն Հ ՎԿ-ի օգտին: Բաղդասարյանի խոսքով` քվեարկելով ՀՎԿ-ի օգտին, ՀՀ յուրաքանչյուր քաղաքացի քվեարկում է իր օգտին, երկրում փոփոխություններ անցկացնելու օգտին, Հայաստանում գրագետ, մրցունակ ու պատրաստված քաղաքական թիմով վճռական փոփոխություններ կատարելու օգտին:

«Հայկական վերածնունդ» կուսակցություն փոխնախագահ Հեղինե Բիշարյանը բարի երթ մաղթեց բոլոր քաղաքական ուժերին, որպեսզի նրանք իրականացնեն իրենց նպատակները: