«Օհանյան-Րաֆֆի-Օսկանյան» դաշինքն ամփոփել է քարոզարշավը

«Օհանյան-Րաֆֆի-Օսկանյան» դաշինքը ընտրություններում հաջողության հասնելու պարագայում խոստանում է ձևավորել այնպիսի միջավայր, որում տնտեսությունն ազատականացված ձևով համաչափ կզարգանա: Մարտի 31-ին լրագրողների հետ հանդիպմանն այս մասին ասաց դաշինքի առաջնորդ, ՀՀ պաշտպանության նախկին նախարար Սեյրան Օհանյանը` ամփոփելով նախընտրական քարոզարշավը: «Մեք պետք է ուշադրություն դարձնենք փոքր և միջին բիզնեսին, որտեղ մրցակցությունը հավասարաչափ կլինի և փոքր բիզնեսի ներկայացուցիչները իրենց լիարժեք կզգան որպես իրենց գործի սեփականատեր»,- «Արմենպրես»-ի հաղորդմամբ` նշեց Օհանյանը: 
Նա հավելեց, որ քարոզարշավի ընթացքում մարդկանց հետ շփումներում զգացել են, որ  մարդկանց հուզում է հայ ազգի համախմբվածության հարցը: «Մենք պատրաստակամություն ենք հայտնել ավելի լայն կոնսոլիդացիա ձևավորել, որը հրապարակ կբերի այն քաղաքական թիմին, որը կզբաղվի երկրի զարգացմամբ: Մենք պետք է մի կողմ դնենք բոլոր տարաձայնությունները: Այս ճակատագրական պահին մենք իրավունք չունենք մեր ժողովրդի առաջ հանդես գալ բզկտված և մասնատված»,- եզրափակեց Օհանյանը:

Իր խոսքում ՀՀ արտաքին գործերի նախկին նախարար, դաշինքի անդամ Վարդան Օսկանյանը նշեց, որ երկրի համար շատ կարևոր նշանակություն ունի ճիշտ ու գրագետ արտաքին քաղաքականությունը: «Արտաքին քաղաքականությունը պետք է ծառայի երկրի տնտեսական խնդիրների լուծմանը, ներդրումների ներգրավմանը, ինչպես նաև անվտանգության ապահովմանը: Մենք ընտրություններում հաջողության հասնելու դեպքում արտաքին քաղաքականությունը կծառայեցնենք մեր երկրի տնտեսության զարգացմանը, դիվանագիտական դաշտում կդրսևորենք ակտիվություն և էապես կփոխենք արտաքին քաղաքականության համակարգը»,- ասաց Օսկանյանը: 

«Ժառանգություն» կուսակցության նախագահ Րաֆֆի Հովհաննիսյանն էլ նշեց, որ Հայաստանում երբեք ընտրությունների միջոցով իշխանափոխություն տեղի չի ունեցել` նկատելով, որ դրա համար այս պահին բոլոր պայմանները կան: Նա կոչ արեց բոլորին զերծ մնալ ընտրակեղծարարություններից` նշելով, որ պատմության անիվը պտտվում է և մի օր սլաքներն ուղղվելու են նրանց դեմ, ովքեր կփորձեն ընտրությունները կեղծելու քայլեր անել: «Մենք հույս ունենք, որ հետընտրական շրջանում կկարողանանք ձևավորել նոր մեծամասնություն և իշխող կուսակցությանը ուղարկել ընդդիմության շ արքեր»,- ասաց Հովհաննիսյանը:

Նա հավելեց, որ իրենք որևէ մեկից կախվածություն չունեն: Հովհաննիսյանի  խոսքով` բոլոր այն քաղաքական ուժերը, որոնք խոսում են միակ ընդդիմություն լինելու մասին, լավ չեն պատկերացնում ժողովրդի պահանջները: